MMEGI WA SEIPONE
POLOKWANE: Nepokgolo ya Ditirelo tša Molamodi wa Dikema tša Setšhaba (CSOS) ke go
lamola dikgakgano magareng ga badudi le Dikema tša Setšhaba le go bona gore molao o
obamelwa ke bohle ka dinako ka moka. Mehleng ya lehono, kudu ka mabaka a polokego le
tšhireletšego, palo yeo e golago ya batho e dula mafelong ao a ageleditšwego. Gantši
mafelong a mabjalo, badudi ba diriša sefero se tee sa go tšwa le go tsena mafelong a bodulo.
Mafelo a a beya polokego ntloraneng ya dinyakwa tša wona gomme tšhireletšo ke e maatla.
CSOS (yeo e lego lekala la Kgoro ya Bosetšhaba ya Bodulo) e be e swere samiti ya matšatši a
mabedi ka 12 – 13 Lewedi 2024 hotelengtsoko mo Polokwane go sedimoša maloko a Dikema
tša Setšhaba le setšhaba ka bophara ka mošomo wa yona wa bolamodi.
Batho bao ba dulago mafelong a go ageletšwa ke setšhaba sa batho ba merafe, maleme,
bogolo, ditumelo le ditlwaelo tša bophelo tša go fapana. Batho ba bangwe ba rata go ruwa
diruiwaratwa bjalo ka dimpša le dikatse. Ka lebaka la setlwaedi goba tumelo ya bona, batho
ba bangwe ba kwana le go hlaba diphoofolo bjalo ka dipudi, dinku goba dikgogo. Batho ba
bangwe ke batho ba semoya bao ba kwanago le go pidinya meropa ge malopo a tsogile.
Batho ba bangwe ba kwana le go dira mašata ge ba opela le go rapela. Batho ba bangwe ba
kwana le go bapalela mmino wa bona wa sebjalebjale godimo ge ba iketlile. Gape mafelo a
mabjalo a na le mafelo ao a lego a badudi ka moka a mohlakanelwa – ditsela, diphaka tša
difatanaga, mafelo a dipapadi le boiketlo, dirapana tša tlhago, bjalobjalo. Go laola setšhaba se
sa dikgahlego tša go fapana, go nyakego sehlopha sa taolo le melao ya taolo.
Go ya ka Molao wa Molamodi wa Dikema tša Setšhaba ke gore mafelo a mabjalo a swanetše
go ingwadiša bjalo ka Dikema tša Setšhaba. Karolo ya mathata ao CSOS e šoganago nawo ke
gore mafelo a mangwe a mohuta wo ga se a ingwadiša bjalo ka Dikema tša Setšhaba. Bothata
bjo bongwe bjo bogolo ke bja taolo ya ditšhelete mafelong a le tefo ya makgetho. Bothata bjo
bongwe ke bja badudi bao ba ganago go lefela makgetho ao a kwanetšwego. E nngwe ya dilo
tšeo di felago di tsoša dikgakgano ke taba ya go hlaba diphoofolo, mašata a mmino goba go
opela kudu nakong ya bošego.
Go ya ka molao, Dikema tša Setšhaba di tlamegile go swara kopanokgothekgothe ya ngwaga
ka ngwaga. Kopanong e bjalo, lekgotla la taolo le swanetše go ala pego ya ditšhelete yeo e
lekotšwego ke balekodi ba dipuku. Kopano e swanetše go kwanela ditekanyetšo tša ngwaga
wo o latelago, mananeo a tlhabologo, koketšo ya makgetho a ditirelo, bjalobjalo. Se sengwe
seo se felago se tsoša dikgakgano ke taba ya gore badudi ba bangwe ga ba tsenele dikopano
mme ka morago ba thulana le diphetho tšeo di tšerwego dikopanong. Ka dinako tše dingwe,
ba taolo ba oketša makgetho ntle le ditherišano.
Keletšo ya Ditirelo tša Molamodi wa Dikema tša Setšhaba ke gore badudi ba swanetše go
lemoga gore ge ba tsena mafelong a go ageletšwa, ba amogela melao yeo e beilwego fao. Ba
swanetše go kgonthiša gore dikema tšeo ba tsenago go tšona di ngwadišitšwe ka mokgwa wa
maleba. Ba swanetše go tsenela dikopano tšeo di bitšwago tša badudi gore ba be le seabe go
diphetho tšeo di tšewago. Gape ba swanetšw go lefa makgetho ao a kwanetšwego.
