Mbalula o re ge ba tšwela pele go šoma, batho ba re ANC ga e na bothata. “Bothata bo na le batho ba bangwe bao ba rongwago ke ANC mme ba re go fihla fa oba romilwego, ba thoma bohodu. Ke ka fao re rego fase ka bomenetša. Mahodu a swanetšwe go notlelelwa,” a realo.
Mbalula o tšere monyetla wo go tshepiša balatedi ba ANC gore mokgatlo o ikemišeditše go hlola mešomo ye 2.5 millione go thoma lehono go ya pele. O tšwetše pele gore mokgatlo o ikemišeditše go netefatša gore bao ba nago le mengwaga ye 35 goba go feta le bona ba hwetše menyetla ya mešomo le gore ba ile go aba ditirelo setšhabeng.
“ANC e abile ekonomi le kgolo ya tšweletšo go Maaforika Borwa. Ba bantši ba itira okare ga ba tsebe efela ba a tseba gore re abile ditirelo setšhabeng ebile re sa tšwela pele go dira bjalo,” a realo.
Mbalula o re ke ka lebaka leo ba swanetšego go šoma ka thata go šireletša tokologo ya setšhaba. “Re swanetše go fihla kgole ka re šireletša bohwa bja mokgatlo le maina a bomahlwaadibona ka ge re tseba gore go na le mahodu ao a lekago go ekiša tšeo e lego tša ANC,” a realo.
O re go na le bothata bja gore bontši bja batho ba palelwa ke go hwetša dijo tšeo di nyakegago. “Rena re re dijo tšeo di swanetše go hwetšagala ntle le tefo ya VAT,” gwa realo Mbalula.
Thutophatlhošo ye ya segopotšo e rulaganywa ngwaga ka ngwaga go keteka, go gopola le go hlompha mešomo ya Chabane le go gopotša batho ka bophelo bjo a bo phetšego.
Nakong ya ge a bolela ka Chabane, Mbalula o rile e be e le molwelatokologo yo a tshwentšwego ke mohlako e sale ngwana mme a šomela batho ba Aforika Borwa le ANC ka seriti le maikemišetšo.
“E be e le molaodi wa Umkhonto We Sizwe mme a tsebega kudu ka leina la ‘The Animal’ (Phoofolo),” ka boikgantšho gwa realo Mbalula.
