“Re phela nakong ya ditlhobaelo tšeo di goletšego godimo ka nako yeo e tšewago ya go lokiša
metšhene, go dutla ga meetse, go itokelela meetse fao go sego molaong, go senywa le go utswiwa ga
ditlabakelo tša mananeo a meetse. Borathekgeniki ba rena, ka lebaka leo, ba nyaka ditlabakelo tšeo di
tlago ba kgontšha go tsaroga phoka le go šogana le ditšhitišo tša kabo ya meetse ka bjako le ka
bokgoni. Ge o lebelela bogolo bja masepala le sekgoba seo se lego gona magareng ga diofisi tša rena
tša disathalaete le metse e mengwe, gore re kgone go hlokomela kabo le tlhokomelo ya mananeo a
rena a meetse, borathekgeniki ba rena ba nyaka dinamelwa tša go botega tša go kgona go fihla kae
goba kae. Go robega kgafetšakgafetša ga metšhene le go senyega ga mananeo a kabo dimasepaleng
tša rena tša selegae, di re gapeletša gore re phele re le malala-a-laotšwe go tiišetša gore ditokišo di
dirwa ka potlako.
“Ngwageng wa go feta wa ditšhelete o nnoši, borathekgeniki ba rena ba šogane le ditiragalo tša go
senyega tše 3 103. Ba kgonne go lokiša tše 2 983, yeo e dirago 96% ya ditiragalo. Go ditiragalo tšeo
tše 2 983 tšeo di lokišitšwego, 1 686 tša tšona di humane tharollo mo nakong ya letšatši le tee, tše 535
nakong ya matšatši a mabedi mola tše 762 di humane tharollo mo matšatšing a mararo goba go feta.
Kelo ye ya kabo ya ditirelo e be e ka se kgonagale ge nkabe borathekgeniki ba rena ba fišegele
mešomo wa bona gomme rena bjalo ka mongmodiro, re swanetše go dira gore modiro wa bona le
ditlabakelo tša maleba tša go phethagatša modiro, di be gona,” a realo ge a tšwela pele.
“Foleti ye ye ntshwa, ka lebaka leo, ke karolo ya dikgato tša rena tša go bonala tša go thekga
maitekelo a borathekgeniki. Difatanaga tše di tla ba matlafatša go phethagatša boikarabelo bja bona ka
pejana, ka nepagalo le ka bokgoni. Dibene tše tša go rwala merwalo, di diretšwe ditikologo tša
dinagamagae. Di tlabaketšwe ka dithulosi le metšhene ya go dira ditlhahlobo le go lokiša mananeo a
meetse – ka lebelo le ka bokgoni. Neelano ye e direga ka nako yeo re lego morerong wa go phatlalatša
mediro ya rena ya kabo le tlhokomelo bjalo ka ge ke boletše nakong ya Polelo ya Maemo a Selete
dikgwedi tše pedi tša go feta. Nepo ke go oketša lebelo la rena la ditokišo ka go tiišetša gore
boratekgeniki ba rena ba beilwe kgauswi le metse yeo ba e šomelago.
“Ge re neelana ka difatanaga tše, a re gokareng le boikarabelo bjo di bo emelago. Boikarabelo bjalo
bo šuta go ya go sehlopha sa kabo le tlhokomelo seo re holofelago gore se tla hlokomela difatanaga
tše le go di dirišetša seo di se reketšwego,” a realo ge a ruma..
