MMEGI WA SEIPONE
GAMATHAPO, Bavaria: “Ge re bolela ka Dr TT Cholo, re bolela ka lešole la nnete leo le
gafilego bophelo bja lona mme le lwetšego naga ye. Ge re bolela ka mokgalabje yo, re bolela
ka motho yo a hlahlilwego ka tša bošole nageng ya Tanzania fela a di nwa moro nageng ya
Rassia. Mokgalabje yo o šomile bjalo ka lešole la MK la go khukhuna fao a bego a selaganya
naga ye go phetha mediro ya mokgatlo. Ka lebaka la mešomo ya gagwe, mafelelong o ile a
golegwa mme a lahlelwa sehlakahlakeng sa Robben Island. O feditše mengwaga ye 16 a
phela le Mandela le ba bangwe sehlakahlakeng sa Robben Island. Ka gona, ge re hlompha
mokgalabje yo, re mo hlompha ka lebaka la mediro ya gagwe ya go lokolla naga ye,” gwa
realo Mopresitente wa Liki ya Bomahlwaadibona ba MK, Dr Snuki Zikalala, nakong ya ge a
bolela moletlong wa go keteka mengwaga e 100 ya Dr TT Cholo ka Mokibelo wa 9 Mopitlo
(Mei) 2026 lepatlelong la Dr TT Cholo, GaMathapo, Bavaria.
Dr Zikalala o re mokgatlo wa ANC o šwahletšwe ke baetapele ba go hloka letswalo bao ba
gogobišago leina la mokgatlo marageng. Ba bangwe ba baetapele ba mokgatlo ke baradia le
mahodu ao a tsenetšego boetapele ka nepo ya go dira bomenetša, go utswa le go ikhumiša.
Baetapele ba mahodu ba go ba le bomenetša, tsogolekobong,le bohodu, ba senya leina la
mokgatlo gomme se se dira gore mokgatlo o lahlegelwe ke thekgo ya setšhaba. O re bagale
ba go swana le Dr TT Cholo ba be ba sa šomele mokgatlo go ikhumiša eupša ba be ba šomela
setšhaba ka nepo ya go thopa tokologo. O re liki ya bona ya bomahlwaadibona e ithaopile go
lwela ntshwafatšo ya mokgatlo ka go fediša bohodu le bomenetša. O re liki ya gabo e ya go
bapala karolo ya go bonala ka gare ga ditšhaba go fetola maemo a ditaba. O re batho ba go
utswetša mmušo ga se batho ba ANC eupša ke baetapele ba bofora bao ba nepilego go ikhola
le go ikhumiša ka thoto ya balefalekgetho.
“Bjalo ka bomahlwaadibona, rena re nyaka baetapele ba go ba le letswalo bao ba
ikemišeditšego go šomela setšhaba. Re nyaka baetapele ba go ba le letswalo bao ba sa
kgotlelelego bohodu, bomenetša le tsogolekobong. Bjalo ka setšhaba, le ka re thuša ka go
bona gore le hlaola le go boutela baetapele bao lena bjalo ka setšhaba le tsebago gore ba a
botega ebile ba hlankela setšhaba ka botshepegi. Kgweding ya Dibatsela (Nofemere) ge re
eya dikgethong, hle kgethang baetapele ba nnete ba go ba le boikarabelo, ba go hlankela
setšhaba. Re rata go hlohleletša baswa gore hle a ba ingwadiše gore ba tle ba kgone go tšeya
karolo dikgethong. Baswa ke baetapele ba gosasa le ka moso gomme bjalo ka
bomahlwaadibona, re duma go ba bona ba tšeya karolo dikgethong ka bontši le gona ka
mafolofolo,” Zikalalala a realo.
