MMEGI WA SEIPONE
DITATŠU, Senwabarwana: “Ke kwele gore le re motse wo o nageng ya gaMolepo … le bušwa ke Ntona Molepo. Ka moka le a tseba gore magoši ga a boutelwe – a tswalwa e le magoši. Bogoši bja go buša setšhaba bo a tswalelwa. Fela bogoši bja thuto ga bo tswalelwe … bo nyaka feela monyetla, maikemišetšo le go šoma ka maatla. Seo Dr Masedi Mothapo a lekago go se dira ka bana ba lena, ke go bopa magoši a thuto a gosasa le ka moso. Potšišo yeo ka moka re swanetšego go ipotšiša yona, ka lebaka leo, ga se ya go re na Setheo (Foundation) sa Dr Mothapo se ka re thuša bjang eupša re ipotšiše gore na ke eng seo nna le wena re ka se dirago go thuša monna yo wa gaMothapo gore a atlege ka gore katlego ya gagwe ke katlego ya bana ba ba rena,” gwa realo Profesa Lesiba Teffo nakong ya ge a efa mantšua tlhohleletšo moletlong wa go keteka tšwelopele ya Foundation ka Mokibelo wa 26 Diphalane (Oktoboro) 2024.
“Potšišo ya rena ke go re na re thuša Dr Mothapo bjang gore a kgone go thuša bana ba ba rena. Re kwele gore modiro o mogolo wo Foundation ye e o dirago ke go thuša barutwana gore mošomo wa bona wa ka sekolong o kaonafale go ba betlela bokamoso bjo bokaone. Akere re re ngwana ke wa setšhaba? A re thušaneng go godiša bana ba. Batho ba bantši ba tšhaba go thuša ka gore ba nagana gore go thuša ke go ba le tšhelete. Go thuša ga go nyake tšhelete ka mehla. Go barutiši bao ba rotšego modiro, yo mongwe a ka re nna ke tla thuša ka go ruta Mmetse, yo mongwe a thuša ka Akhaonthing goba Temo le dithuto tše dingwe. Ba bangwe ba ka ruta bana go roka diaparo goba dieta, go loga, go betla goba se sengwe seo ba ka iphedišago ka sona. Ba bangwe ba ka fana ka mehlare gore go bjalwe mehlare gore lefelo le le bogege, le be le serithi.
“Ke rile go fihla mo, ka sepelasepala le jarata ye. Ke lemogile gore ke e kgolo ebile go na le meetse. Keletšo ya ka ya mathomo ke gore na re reng re sa diriše karolo ya jarata ye go hloma serapana sa merogo? Badudi ba ka kgona go reka merogo go tšwa mo mola ba bile ba tla ja merogo e menanana ya phepo e botse. Ke lebetše mekotlana ya ka ya dipeu Tshwane fao ke tšwago gona fela pele ke tloga fa ke tla tlogela R500 ya go reka dipeu go thekga serapana se. Le rena bao re tlilego mo mamohla re ka thekga projeke ye ka go lahlela R20 ya go reka peu ka sekhwameng gore projeke ye e tšwele pele,” Teffo a realo a hloma leswika la projeke ya go bjala merogo e menanana bjalo ka karolo ya diprojeke tša Foundation ya Dr Mothapo.
“Taba e nngwe yeo ke ratago go bolela ka yona ke potšišo ya gore, bjalo ka batswadi le bjalo ka setšhaba, na re dirang go tloša bana mebileng? Lefelo le le šoma le bana ka morago ga ge ba tšwele sekolo le mafelelong a beke … le tloša bana mebileng la ba tliša mo go ba tlabakela ka tsebo le bokgoni bja bophelo. Bana ge ba le fa, ntle le dithuto tšeo ba di humanago tšeo di tlaleletšago tšeo ba di dirago ka dikolong, ba gahlana le bana ba bangwe bao ba ithutago tše dingwe go bona le go dira segwera. Bjalo ka batswadi le setšhaba, re na le boikarabelo bja go tloša bana ba rena mebileng fao go nago le botagwa, diokobatši, bohodu, bosenyi le tše dingwe. Lefelo la go swana le le, le diretšwe go bopa magoši a thuto a go ba le tlhompho le boikarabelo.
“Karolo ya bothata bja rena bathobaso, ke gore re rata go direlwa kudu. A re ithuteng go itirela dilo esego go direlwa ke batho ba bangwe. A re ithaopeng … re ithute go dira dilo ka noši ka gore ge o dira dilo ka noši, o kgoboketša tsebo le boitemogelo bja go dira dilo. Monna yo mongwe ge a bolela ka Sesemane o re: ‘It is not the number of years that you spend in your life that determines your value but it is the life that you put in the years that count’ (Ga se palo ya mengwaga yeo o e feditšego o phela yeo e bolelago bohlokwa bja gago eupša ke bophelo bjo o bo tšhelago /lokelago ka gare ga mengwaga ya gago bjo bo lego bohlokwa. Ge bophelong bja gago o ka humana go se na batho ba bangwe, ka ntle le lapa la gago, bao ba holegilego ka bophelo bja gago, gona o ka no se llelwe ke motho le mohla o ile molete-mohlaela-thupa, ” Teffo a realo.
