SASELAMANI: Maphodisa a mabedi a ka gare ga mathata ka morago ga go šomiša sefatanaga sa mmušo bošaedi. Se se tla ka morago ga gore maphodisa ao a šomago setišing sa Saselamani ka ntle ga Venda a gatišwe kgatišong a laiša dikgong ka gare ga sefatanaga sa maphodisa.
Tiragalo ye go gononwa e diregile ka Labobedi la 26 Dibatsela 2024 mme e phatlaletše le matlakala a dikgokaganyo moo badudi ba ntšhitšego maikutlo a bona gomme ba ipiletša gore maphodisa ao a rwešwe boikarabelo. Maphodisa ao a be a rwala dikgong motseng wa GaSanari seleteng sa Vhembe.
Tiragalo ye e gogile šedi go tšhomišompe ya ditlabakelo tša mmušo mme gwa tšwelela le pitšo ya maikarabelo ka gare go sephodiisa. Badudi ba tlogetšwe ba befetšwe ka tiragalo ye, mme ba gonona gore tiragalo ye e ka ba e le e nngwe ya go dira gore maphodisa a tšeye nako go fihla mafelong a bosenyi.
Edward Makhuva (38) o re maitshwaro a maphodisa a ga se a dumelelwa. “Re dula re sola maphodisa ge a tšeya nako go fihla tiragalong ya bosenyi. Tiragalo ye e ka ba e le ye nngwe ya go dira gore maphodisa a tšeye nako ge a biditšwe ka gore ba tla be ba phetha mabaka a bona ka didirišwa tša mmušo,” a realo.
Ba bangwe ba re ba nyaka go tseba gore ke ka lebaka la eng maphodisa ao a be a rwala dikgong le gore a be a di iša kae.
“Mašeleng a rena a motšhelo a šomišwa bošaedi. Ge re bitša maphodisa, a tšeya nako go fihla mme gabjale re ipotša gore ba tla be ba phetha mabaka a bona ka mašeleng a rena a motšhelo. Go swanetše go be le magato a kgalemo go tiragalo ye ebile le rena setšhaba re nyaka dikarabo,” gwa realo James Molaba (36).
Mokhomišinare wa maphodisa a profense ya Limpopo, Lieutenant-General Thembi Hadebe o ntšitše taelo ya gore go be le dinyakišišo ka morago ga tšhomišo yeo e sa dumelelwago ya sefatanaga sa maphodisa seo se gatišitšwego kgatišong.
“Ke ntšhitše taelo ya ka pela ya go nyakišiša sefatanaga sa maphodisa a setiši sa Saselamani seo se bonwego se laiša dikgong motseng wa GaSanari,” a realo.
Hadebe o re laetše Major-General Eddie Van Der Walt go nyakišiša mme a netefatše gore magato a maleba a tšewa kgahlanong le bao ba amegago go ya ka melao le dikgalemo tša sephodisa.
“Tšhomišompe ya didirišwa tša mmušo e ka se dumelelwe profenseng ye. Didirišwa tša mmušo di swanetše go šomišwa maleba le go iša ditirelo setšhabeng,” a realo.
