Borakgwebo ba lesomepedi go tšwa Zone 1 Seshego ka ntle ga Polokwane ba tšere sephetho sa go
koleka R2 000 motho ka yo tee mme mašeleng a a fihla R24 000.
Ba aba mašeleng a go leloko la bona gore le kgone go reka madila. Mašeleng a a swanetše go bowa
morago ka morago ga dibeke tše pedi ntle le manamane mme a tlo fetišetšwa go leloko le lengwe.
Modulasetulo wa sehlopha sa Big Six Jazz Club, Chicco Mojapelo (50), o re nepo ya bona ke go
thušana bjalo ka borakgwebo gore dikgwebo tša bona di se phuhlame.
“Re lemogile gore twatši ya khorona le kgaotšo ya mohlagase di gobaditše dikgwebo tša rena mme
bontši bja tšona di tswaletšwe ka ge ba palelwa ke go reka madila a go rekiša. Re nyaka go thekgana
gore re godiše dikgwebo tša rena mme ye ke tsela yeo re ka e šomišago. Mašeleng a a tlo re thuša
gore dikgwebo tša rena di tšwele pele go gola,” a realo.
Ba kopane mmogo ka Mokibelo, 1 Mosegamanye 2023 mme ba abela Mapula Mathabatha (64)
mašeleng a go lekana R22 000 gore a kgone go godiša kgwebo ya gagwe yeo a e bitšago Jacknife
Liquor Tavern.
Ba ile ba bina, ba ipshina ka mmino wa jese. Kopano ye e be e le karolo ye nngwe ya go fokotša
kgatelelo ya mogopolo. Se ke ka lebaka la gore bontši bja bona ba tšofetše mme ba palelwa ke go ya
mafelong a go rekiša madila ka ge ba kopana le baswa. Efela ka moletlo wo ba kgona go iketla
gabotse.
Mathabatha o re o thabišwa ke gore ba kgona go thušana. “Gonabjale re kgona go hloka kgatelelo ya
mogopolo ya gore dikgwebo tša rena di tla phuhlama,” a realo.
O re dikopano tša bona di ba thuša go keteka gabotse. “Mmino wa jese o ruta motho gore a hlweke
ebile a be le maitshwaro. Ga go na dintwa. Seo re se dirago ke go iketla ra gopotšana ditiragalo tša
kgale,” a realo.
Koko Rosinah Ramafemo (69) o boditše Seipone gore o thomile go rata mmino wa jese ka 1970. “Ke
o ratela gore o ruta batho mekgwa ye mebotse ebile o dira gore re ralokele kgole le dikgohlano. Re
nyaka go ruta baswa mmino wo wa jese le setšo sa wona ka gore ga go na dintwa le diokobatši
mminong wa jese,” a realo.
