Bašomi ba rile ge ba fihla lefelong leo, ba hwetša banna ba babedi bao ba nametšego ka sefatanageng sa bašomi bao go ba iša mo molwetši a lego gona. Ba rile go fihla, ba makatšwa ke ge yo mongwe wa banna a ntšha sethunya mme gwa tsupologa bogononelwa ba bangwe ba babedi. Bagononelwa bao ka moka ba ile ba gapeletša bašomi bao gore ba namele ka morago ga sefatanaga sa pele mme ba ba iša lefelongtsoko moo ba ilego ba ba utswetša dillathekeng, jewelari, tšhelete yeo ba b go ba e swere mme ba gapeletša yo mongwe gore a ba romele tšhelete a šomiša sedirišwa sa sellathekeng (banking app).
Mmoleledi wa maphodisa, Colonel Malesela Ledwaba, o re ba nyakišiša molato wa go utswa o itlhamile mme ba kgobokantšhitše sehlopha sa banyakišiši go tsomana le bagononelwa ba. O re dinyakišišo tša pele di šupa gore bašomi ba ba swerwe poo ka morago ga go hwetša mogala wa molwetši wa go nyaka thušo ya pele.
“Re kgala tiragalo ye ka bogale mme sehlopha sa banyakišiši se tsene fase go tsomana le bagononelwa,” a realo.
Ledwaba o re ba ipiletša go mang kapa mang yo a nago le tshedimošo yeo e ka thušago maphodisa go golega bagononelwa gore a ikgokaganye le Captain Simon Nkadimeng go 082 303 9907, goba ba leletše 08600 10111.
Molekgotlaphethiši wa Kgoro ya Maphelo, Ngk Phophi Ramathuba, o kgadile tiragalo ye ka bogale, a laetša gore ga go amogelege gore bašomi ba pele ba ikhwetše ba le ka gare ga tiragalo ya bosenyi bja mohuta wo.
Ramathuba o re tiragalo ye e beya kotsing maphelo a bašomi ba go ikgafela mešomo ya bona ka go hlankela setšhaba mme se se dira gore ba be le dikgonono nakong ya ge ba hwetša megala ya balwetši le ge e le ya nnete.
“Polokego le tšhireletšo ya bašomi e tla pele mme yo a ba hlaselago o hlasela lefapa ka moka la maphelo le badudi bao ba ba hlankelago. Re ka se dumele tiragalo ya mohuta wo kgahlanong le bašomi bao ba ikemišeditšego go boloka maphelo a batho,” a realo ka go befelwa.
