POLOKWANE: Batswadi ba ferekane ka ge barutwana ba go feta 240 ba palelwa ke go
ngwadišwa dikolong mo Polokwane. Se se direga ka morago ga gore Kgoro ya Thuto e
tshepiše batswadi gore barutwana bao ba sa ngwadišwago ba ile go ngwadišwa pele ga
Laboraro, 29 Pherekgong 2025. Barutwana bao ba 246 ba ka tlase ga sedikothuto sa
Pietersburg go la Polokwane. Batswadi ba boifa gore bana ba bona ba tšwela pele go šalela
morago dithutong tša bona.
Barutwana ba tshwenywa ke gore ba ile go palelwa ke go ba seemong se tee le barutwana ba
bangwe ge ba sa ngwadišwe dikolong ka pela. Sophia Modiba (40) o re bana ba bona ba
šalela morago nakong ya ge ba bangwe ba tšwela pele ka dithuto letšatši ka letšatši.
“Le ke lebaka le lengwe leo le dirago gore bana ba rena ba palelwe ke go tšwelela gabotse
dithutong mafelelong a ngwaga ka gore ba ile go ngwala tšeo ba paletšwego ke go hwetša
monyetla wa go ithuta tšona. Re nyaka gore Kgoro e ngwadiše bana ba rena go ya ka tshepišo
yeo e dirilwego. Bana ba ba le kgatelelo ya mogopolo ge ba dutše ka malapeng ba sa dire selo
gomme ba ka feleletša ba dira tše mpe,” a realo.
Batswadi ba bangwe ba ipotšiša gore na Kgoro e ka ba e na le leano la go thuša barutwana
gore ba tle ba kgone go ithuta tšeo ba paletšwego ke go ithuta gore ba kgone go ba seemong
se tee le barutwana bao ba thomilego dithuto tša bona ka letšatši la go bulwa ga dikolo.
Adolf Senona (38) o re ba hlakana le mathata a mohuta wo ngwaga ka ngwaga. “Re duma o
ka re Kgoro e ka šoma ka lebelo go ngwadiša bana ba rena. Sehla sa mathomo se fela ka
kgwedi ya Hlakola mme ga ke dumele gore bana ba rena ba ka ba ba ithutile se sengwe
nakong yeo e šetšego,” a realo.
Mmoleledi wa Kgoro ya Thuto, Mike Maringa, o re palo ya barutwana bao ba sa
ngwadišwago sedikothutong sa Pietersburg e theogile go tšwa go 816 go ya go 246.
“Bontši bja barutwana bao ba sa ngwadišwago ke ba mphato wa R go fihla go wa bošupa.
Bašomi ba šoma ka thata go netefatša gore barutwana bao ba šaletšego ba a ngwadišwa,” a
realo.
