Ge a ntšha mantšu a kwelobohloko, Meyaraphethiši wa Masepala wa Selete sa Sekhukhune, Cllr Minah Bahula, o re o nyamišitšwe ke tiragalo yeo e bohloko. O re o tla etela malapa a batšwasehlabelo go iša thekgo le mantšu a tlhobošo. Yena o tla fegeletšwa ke Meyara wa Masepala wa Selegae wa Fetakgomo-Tubatse, Cllr Eddie Maila. Gape baetapele ba ba tla etela le bao ba lego bookelong ka dikgobalo go ya go ba thoba dipelo.
“Re tla le bea dithapelong tša rena ebile re lla le lena mo nakong ye e boima, ya bohloko. Go hlokofala ga motho ke taba e bohloko e le ruri fela go hlokofala ga ngwana yo e lego bokamoso bjo re bego re bo lebetše, go roba pelo le go feta. Ge lehu le etla ka morago ga bolwetši goba mabaka a mangwe a tlhago, le a baba fela ge le etla bjalo ka tladi ya lesehla yeo e rathago mosegare ka kotsi ya sefatanaga, fao manyami le masetlapelo a nama a eba ka kudu,” gwa realo Meyara Maila.
Ka nako ya kgatišo, dintlha ka botlalo ka seo se hlotšego kotsi, di be di sa hlaka gabotse.
