“Ka sekgowa go fela go bolelwa ka tsela yeo e sego ya sepelwa ke ba bantši (the less
travelled road). Yeo ke tsela yeo Hlabirwa’a Bauba a ilego a ikgethela yona bophelong. Bjalo
ka karolo ya semelo sa gagwe, e be e le motho wa go rata sekolo. O itimile dilo tše dintši gore
a re iše sekolong. Banabešo gona mo ba a tseba gore re be re hlaka bjang gore re fihle
sekolong… re itshepelela ka dikoloi tša gagwe tša maratha. Tšatši le lengwe o hwetša re
šaretšwe Bronkhostspruit… re le tseleng ya go ya Pitori fela a re ke le iša sekolong – ke seo
ke mo lebogelang sona. O be a re go rena a re thuto ke kotse e maatla yeo motho a ka se e
tšeelwego ke motho bophelong.
“Ka gore le nna ka nako e nngwe ke be ke na le go tshwenyatshwenya, o ile a tloga
Mohlaletsi a tla Pitori ba mmiditše. O itše a re go nna: ‘Monna Khutšo, na o nyako tla o
mpakiša dibego le mahlakore kua Mohlaletsi? O se ke wa bušeletša wa dira phošo’. Go
tloga letšatši leo ke ile ka tšeya mantšu a gagwe ao a nkagilego. Ke yona taba yeo e
ntšhušumeditšego gore ke fihle kgole ka thuto. Ka ntle le yena, mohlomongwe nkabe ke le yo
mongwe wa bao ba sa tsebego. Sereto sa gagwe, ge le ka se hlokomela, se na le boporofeta ge
o lebelela ditiro tšeo a kopanego natšo. Seretong sa gagwe o re:
‘…Ke laeditše thamagane tsela – thamagane ya bowa ya nkgatikela…’.
‘O ile Kgagudi Sebatana, O ile nare ya mosadi yeo e tšwago Tšate e se na moekeletši… gomme ya ekelela le
Marota le Mapota’a Mahubedu’
“Bapedi, mokgalabje yo o re thuletše ditsela… o re buletše ditsela. O be a ikgafile mošomong
wa gagwe mme a sa rate gore go be le seo se ka mo thibelago goba go mo tsena pele
morerong wa gagwe. Morero wa gagwe e be e le gore a buše Bopedi … go bo kopanya gore e
be selo se tee le go šireletša setšo sa gabolena. Bapedi, a re rataneng, re be ngatana e tee.
Tšaborena di a thopša, tšaborena di senyegile. Go ngapangapana gona go tla no fele go le
gona fela a re beng batee gore re kgone go lokiša seo Modimo le badimo ba ratago gore se tle
se phethagale, e lego bjona bogošikgolo bja lena. Tše dintši re di kwele ba a di bolela…tšeo
ke tša bona. Rena a re lebeleleng tšeo di tlogo aga Bopedi bjo.
“Le se ke la re sola ka moswane. Re leka go sokolla fao go ilego gwa senyega. Esale e telele
tsela ye gomme ka ntle le lena Bapedi, e ka se kgonagale. Re re re farafareng ge re iša taba ye
pele. Ke rata go leboga batho bao ba thekgilego Hlabirwa go fihla letšatšing la gagwe la
mafelelo. Ke re batswadi ba ka tšwelang pele go re thekga ka gore ga go ye go ba bonolo.
Fela go ba ga lena maphelong a rena, go re fa kholofelo ya gore letšatši le lengwe re tlilo
kgona, re be re fihle fao re lekago go fihla gona,” Mokgoma Khutšo a realo.
