GACHUENE: Kgoro ya Maphelo mo Limpopo e tšere sephetho sa go tswalela kliniki ya
GaChuene lebakanyana. Se se tla ka morago ga pego ya gore kliniki ye e tlo bulwa ka
morago ga go tswalelwa matšatši a mane 4 motseng wa GaChuene ka ntle ga Polokwane.
Go tswalelwa ga yona go tla ka morago ga tiragalo ye šoro moo baoki ba babedi ba
mengwaga ye 28 le 47 ba swerwego poo, ba tšewa ka kgang mme ba katwa nakong ya ge ba
šoma bošegong bja Labohlano, 10 Pherekgong 2025. Gabjale kliniki ye e ile go tswalelwa go
fihla nakong yeo e sa tsebjego.
Mmoleledi wa Kgoro, Neil Shikwambana, o re sephetho se se tla ka morago ga tekolo ya
seemo sa tiragalo yeo e amilego bašomi.
“Ka morago ga go gopolela seemo sa baoki, kudu megopolong le mebeleng ya bona ka
morago ga tiragalo ye gammogo le go lekodišiša polokego ya bona, Kgoro e dumela gore go
kaone kliniki ye e tswalelwe lebakanyana,” a realo.
Shikwambana o re ba nyamišwa ke masetlapelo ao baoki bao ba fetilego go wona.
“Polokego, maphelo le pholo ya megopolo ya bašomi ba rena di bohlokwa kudu mme
matshwenyego a bona a swanetše go rarollwa pele kliniki ye e ka bulwa gape,” a realo.
O re Kgoro e ikemišeditše go matlafatša tšhireletšo mafelong a maphelo profense ka bophara
go netefatša gore bašomi ba phetha mešomo ya bona ntle le go boifela polokego ya bona.
“Kgoro e ile go šoma le batšeakarolo, maphodisa gammogo le baetapele ba setšhaba go
netefatša gore polokego ya maleba e ba gona kliniking ye pele e ka bulwa,” a realo.
Mo lebakeng le, badudi ba eletšwa go hwetša thušo ya maphelo mafelong a mangwe a
kgauswi go swana le GaMaja, Soetfontein le Block B go fihla seemo sa kliniki ya GaChuene
se rarollwa.
“Re leboga badudi ka go kwišiša le thekgo ya bona ka go netefatša gore maphelo a bašomi ba
rena a bolokega,” gwa realo Shikwambana.
Gabjale badudi ba tshwenywa ke gore go tswalelwa ga kliniki ye go beya maphelo a bona
kotsing, kudu bao ba hlakago.
“Re ile go hlaka mme bontši bo ile go dula ka malapeng a bona ge ba lwala ka gore ba hloka
mašeleng a go lefela dinamelwa go ya mafelong a mangwe a maphelo go hwetša thušo. Re
kgopela Kgoro gore e šome ka lebelo go netefatša gore kliniki ye e bulwa gape,” gwa realo
Kedibone Mabotja (49).
Mmoleledi wa maphodisa, Brigadier Hlulani Mashaba, o re ba nyakišiša melato ya go hula,
go tšeya ka kgang le go kata.
