Balwetši bao ba befetšwego ba boditše Seipone gore seemo se se ba gapeletša go etela kliniki ye letšatši ka letšatši go hlola gore na difaele tša bona di hweditšwe goba aowa.
Molwetši wa mengwaga ye 44 o rile: “Baoki ba re boditše gore difaele tša rena di hlakahlakane mme di tletše fase. Ka fao, ba palelwa ke go di hwetša. Ba re bašomi bao ba šomago ka difaele ba rakilwe mošomong, ke ka fao go hlakahlakanego,” a realo.
Seemo se se tlogetše balwetši bao ba nago le malwetši a go se alafege ba boifela maphelo a bona. Molwetši wa mengwaga ye 35 o re o na le bolwetši bja go se alafege mme o gapeletšega go se ye mošomong gore a tle a hwetše dihlare tša gagwe.
“Dihlare tša ka di fedile mme ga ke tsebe gore go ile go direga eng ka nna ge nka se di hwetše. Se se ra gore ke tabogile matšatši ke sa nwe dihlare tša ka. Ka fao, ga ke tsebe gore mmele wa ka o ile go amega bjang,” a realo ka go nolega moko.
Ba bangwe ba re ba šomiša dinamelwa tša bohle go fihla kliniking ye ka ge ba dula kgole. “Se se ra gore ke ile go feleletša ke tlogela go tla mo kliniking ka gore ga ke na mašeleng a go namela dinamelwa letšatši ka letšatši. Ba bangwe ba rena ba ile go feleletša ba lahlegetšwe ke maphelo ka lebaka la seemo se,” gwa realo mokgekolo wa mengwaga ye 61 ka go boifa.
Gabjale ba swaya Kgoro ya Maphelo phošo ka ge e palelwa ke go nolofatša lenaneo la yona la difaele ka ge tiragalo ye e ka tla ya direga gape. Ba re Kgoro e raloka ka maphelo a bona.
Mmoleledi wa Kgoro, Neil Shikwambana, o re ga se ba tsebišwe ge tiragalo ye e direga. “Gabjale re swanetše gore re emele pego gore re tsebe gore gabotse go diregile eng,” a realo.
