Se ke ka lebaka la sethokgwa seo se dikaneditšego sekolo mme dinoga di dulago gona. Barutwana ba bolaile noga ye bogale ya papusi (puff adder) mathomong a kgwedi ya Hlakola 2024 ka ntle ga sekolo. Ba bolaile e nngwe gape ka Mošupologo, 18 Hlakola 2024 mme ditiragalo tše ga se tša mathomo. Batswadi bao ba boifago ba re ba belaetšwa ke gore yo mongwe wa barutwana a ka lahlegelwa ke bophelo.
“Bana ba rena ba fela ba bona dinoga tšeo tše kotsi. Tše dingwe ba kgona go di bolaya mme tše dingwe di a tšhaba efela re boifa gore yo mongwe a ka feleletša a longwa. Bana ba rena ga se ba bolokega sekolong se,” gwa realo Josephine Ledwaba.
Ba nyaka gore sethokgwa seo se tlošwe pele morutwana yo mongwe a lahlegelwa ke bophelo. Lucky Mathaba (39) o rile: “Re phela ka poifo ya gore bana ba rena ba ka gobala. Nako le nako ge sellathekeng sa ka se lla, ke tšhoga gore e ka ba e le mogala wa go tšwa sekolong ke tsebišwa gore ngwana wa ka o lomilwe ke noga,”
Mokhanselara wa mokgatlo wa Democratic Alliance masepaleng wa Polokwane, Tinny Chidi, o re ba hweditše dingongorego tše mmalwa go tšwa go batswadi ka seemo se.
“Re ngwaletše molaodi wa maselapa, Thuso Nemugumoni, lengwalo re mo kgopela gore a tsenelele seemo se ka pela gore sethokgwa se se tlošwe,” a realo.
Chidi o re ge ngwana yo tee a ka longwa ke noga, masepala o tla swanelwa ke go bewa molato ka ge o hlokomologa le go hlwekiša sethokgwa ka ntle ga sekolo.
Mmoleledi wa masepala, Thipa Selala, o re lefelo le lengwe le le lengwe la go bulega goba la go sepela le nyaka go hlwekišwa gabedi goba gararo go fihlela seemong seo se nyakegago.
“Go fokotšwa ga sethokgwa seo ka ntle ga sekolo go diregile mafelelong a kgwedi ya Pherekgong 2024 mme e be e le la mathomo. Bašomi ba EPWP ba tsene fase ka go fokotša dithokgwa mme ba fihlile kgauswi le sekolo se, ka fao ba ile go tloša sethokgwa seo,” a realo.
