MOGALE SEKWELA
GASEKGOPO: Bontši bja batswadi ba swabišwa ke bana ba bona bao ba sa itekanelago mme ba ba khutiša ka malapeng gore ba se raloke le go bonwa ke bana ba bangwe. Go fahloša badudi, barutwana ba sekolo sa tlase sa Maladuma go la GaSekgopo ka ntle ga Modjadjiskloof ba ile ba tsenela mosepelo wa 3km wa boithabišo (fun walk) go godiša setšo, koketšo ya tsebo, kamogelo le thekgo go batho bao ba phelago ka bogolofadi.
Ba sepetše go tloga sekolong sa bona ka Labohlano la 6 Lewedi 2024 mme ba leba lefelong la Sekgopo Drop-In Centre leo le hlokomelago bana ba go hlaka, ba go hloka batswadi gammogo le bagolofadi. Nepo e be e le go fahloša badudi, go dira gore bagolofadi ba ikwe ba amogelegile magareng ga barutwana le setšhaba ka kakaretšo.
Hlogo ya sekolo, Mna Jack Segwapa, o re ba be ba nyaka go hlohleletša batswadi gore ba dumelele bana ba bona ba bagolofadi gore ba gwerane le go raloka le bana ba bangwe ka dinako ka moka.
“Le ge e le gore sekolo sa rena se na le bana ba go itekanela mebeleng, re bone go le kaone gore re rulaganye mosepelo wo gore re rute barutwana ba rena le badudi gore bagolofadi le bona ke batho mme ba nyaka lerato le tlhompho bjalo ka mang le mang. Akere batho ga ba kgethe gore na ba nyaka go belegwa ba le bjang…. yeo ke taba yeo e nogo direga. Bana ba bagolofadi ke bana go no swana le bana ba go itekanela. Dinyakwa ditoro le ditlhologelo tša bona, di swana le tša bana ba go itekanela,” a realo.
O re nepokgolo e be e le go hlohleletša setšo sa kamogelano, tlhompho le thekgo go bagolofadi gammogo le go ba keteka bjalo ka batho le bjalo ka karolo ya setšhaba.
“Re rata go bona batswadi ba bangwe ba ikgantšha ka bana ba bona ba bagolofadi ka gore ga se ba kgethe go ba ka tsela yeo. Ba swanetše go ba dira gore ba dule ba thabile, ba na le tshepo ba bile ba ipona bjalo ka karolo ya setšhaba,” a realo.
Segwapa o re ba nyaka go fediša mellwane le kgethologanyo gore go be le setšo sa kwelobohloko, kwešišo le thekgo go bagolofadi.
Morutwana, Tumelo Mohale (11), o re ba ithutile kudu ka bogolofadi. “Bjale ke y tseba gore bagolofadi ba nyaka go swarwa ka tlhompho le lerato. Mosepelo wo o re rutile tše dintši tšeo ke tlago go di abela bagwera ba ka,” a realo.
