Se se tla ka morago ga gore go netefatšwe gore yo mongwe wa go fetelwa ke twatši ye
profenseng ya Gauteng ke mohlankela-setšhaba sa Limpopo efela a le Gauteng go ithuta.
Molwetši yo o tšere leeto la go ya Hammanskraal go ithuta matšatšing a mmalwa a go feta
mme a amogelwa sepetleleng sa Gauteng ka morago ga go laetša dika tša phetelo.
Molekgotlaphethiši wa Kgoro ya Maphelo, Ngk Phophi Ramathuba, o eletša badudi gore ba
dule ba ntšhitše mahlo dinameng ka dinako ka moka. O re molwetši yo a netefaditšwego ke
monna wa mengwaga ye 52 go tšwa masepaleng wa Greater Giyani efela a šoma Musina.
“O ile a etela Hammanskraal go ithuta matšatšing a mmalwa a go feta. O amogetšwe
sepetlela go la Gauteng ka morago ga go laetša dika tša phetelo,” a realo.
Ramathuba o re kholera ke twatši ye šoro yeo e hlolwago ke go metša tšhila yeo e nago le
twatši. Batho ba ka lwala ge ba eja dijo goba go nwa meetse ao a nago le twatši ya kholera.
“Dihlopha dileteng tša Vhembe, Mopani le Waterberg di dutše komana-madula-e-bapilwe.
Badudi ba Giyani le Musina bao ba lego kgauswi le molwetši yo ba hweditšwe, gwa dirwa
diteko mme ba hwetšwa ba se na twatši ye,” a realo.
O kgopela badudi ka moka gore ba ke itšhireletše ka go nwa meetse le go ja dijo tša go
hlweka. O re ba swanetše go hlwekiša diatla tša bona kgafetšakgafetša.
“Dika tša twatši ya kholera di akaretša go hlatša, go swarwa ke lenyora kudu, kgatelelo ya
maoto (leg cramps), go se dudišege gammogo le go dula motho a tenegile,” a realo.
Twatši ye e ka ba le dika tše nnyane mme ka nako e nngwe dika tšeo ga di bonagale efela go
na le dika tšeo di lego šoro tšeo di ka dirago gore motho a hlokofale.
“Badudi ba eletšwa go etela mafelo a bona a maphelo a kgauswi le semetseng ge ba lemoga
dika tše,” gwa realo Ramathuba.
