Badudi ba ngongorega gore ba ile go palelwa ke go lefela ditefelo tše ka ge ekonomi e tekateka mme
bontši bja bona ba sa šome. Bao ba šomago ba lefelwa mašeleng a fase. Ba bangwe ba ipotšiša gore ke
ka lebaka la eng masepala o hlatloša ditefelo mola ba na le dibeke ba sa hwetše meetse dipomping tša
bona.
“Re na le tekano ya go feta kgwedi go la Extension 71B ntle le meetse. Ba hlahloša ditefelo tša
mohlagase mola re tshwenywa ke kgaotšo ya mohlagase. Re mathateng,” gwa realo Tumelo Masilo (49).
Khutso Ramokwele (36) o rile: “Bakeng la gore ba rarolle ditefelo tšeo di fošagetšego, ba oketša ditefelo.
Masepala o nyaka go re bolaya re phela ka tlhatlošo ye,” a realo.
Ba bangwe ba ipiletša gore masepala o lekodišiše tlhatlošo ye. Mmoleledi wa masepala, Thipa Selala, o
re ka lebaka la ekonomi yeo e lego fase, masepala o ile wa swanelwa ke go hlatloša ditefelo tša meetse
le mohlagase go tšwa go 6% go ya go 15% le 15.10% ka tatelano ya tšona mme ditefelo tša ditirelo tše
dingwe tša ya godimo ka 6%.
“Ge go dumelelwa ditefelo tše diswa, lekgotla le lebeletše mathata a ekonomi. Se se akaretša ditefelo
tša rena tša go reka meetse le mohlagase ka bontši go baabi ba meetse le mohlagase,” a realo.
Selala o re lekgotla le kgobokeditše R272millione go abela badudi bao ba palelwago ke go lefela ditirelo,
ditirelo tša mahala.
“Badudi ba ile go hwetša 6Kl ya meetse a mahala le mohlagase wa 100kWh. Ga ba ye go lefela tefelo ya
go tloša ditšhila le kelelatšhila. Go dumelelwa go hwetša diphokoletšo tše, letseno la ka lapeng ga la
swanela go feta R5 160 ka kgwedi,” a realo.
