Badudi ba metse ya Marikana le Botshabelo Ga-Mothapo ba nwelela ka gare ga seemo se boima sa go hloka kabo ya ditirelo. Bontši bja bona ba lla tlala ya meetse gomme ba itshepetše meetse a didiba ao ba a šomišago ka malapeng a bona. Godimo ga moo ba hlatswa diaparo tša malapa a bona gona moo didibeng, se e le go leka go fokotša mošomo. Bontši bja badudi ba ba itemogela tlhokego ya ditirelo ka kakaretšo go etša kabo ya meetse le ditsela mola motse wa Marikana wona o hloka le mohlagase. Badudi ba gona moo Marikana ba iphelela ka go rema dikgong, dikerese le tše dingwe gore ba kgone go tšwetša bophelo pele.
Yo mongwe wa badudi ba mafelo a, yoo a kgopetšego go ba hlokaina o rile, “Re a tlaišega ebile re tlwaetše go lebana le seemo se boima sa go kalokana gore re hwetše meetse. Re nwa meetse a ebile re apea ka wona. Bao ba nang le mašeleng ba kgona go reka meetse a go nwa a go lekana faki. Ke na le megwaga ya go feta lesome ke dula mo Marikana. E sale ke ngwadiša ntlo ya RDP le gabjale ke sa letile ebile ke ineetše. Ditsela tša rena ke maope, dikoloi ga di sepele. Bjale mmušo nke o se ke wa re tlaiša ka meetse ka gore meetse ke bophelo.”
Re boledišane le mmoleledi wa masepala wa Polokwane, Mna Thipa Selala, ka seemo se. Yena o rile ge a fetola a re, “Re le masepala, re tla romela bahlankedi ba rena go ya go lebeledišiša seemo sa badudi ba. Re tla le hlalosetša dintlha ka botlalo ka pejana ge bahlankedi ba rena ba sena go re fa dipoelo”.
