POLOKWANE: Mekgatlo ya Democratic Alliance (DA) le African National Congress
(ANC) e gogagogana mabapi le kabo ya ditirelo. Se se tla ka morago ga gore DA masepaleng
wa Polokwane e fihliše tšhišinyo ya dingangišano mabapi le tlhokego ya kabo ya meetse go
badudi ka Labone, 30 Pherekgong 2025 fela ANC e ganne tšhišinyo yeo.
Gabjale DA e re ANC mo masepaleng e etišitše dipolitiki pele mola bath oba etla ka morago.
Mokhanselara wa DA masepaleng, Johan Retters, o re ANC e ganne dingangišano mme e ba
latofatša ka dintwa tša dipolitiki nakong yeo e lego gore badudi ba tshwenywa ke tlhokego ya
meetse go tloga ka 2017.
“Mokgatlo wo o lego pušong o iša badudi fase ka ge tlhokego ya meetse e tšwela pele.
Masepala ga o na dikarabo tša go fetola seemo seo se šitelago maphelo a badudi,” a realo.
Retters o re toropo ya Polokwane e lahlegelwa ke letseno leo le ka šomišwago go lokiša
didirišwa tša meetse.
“Go oketša mathata a tlhokego ya meetse, Molekodipharephare wa Matlotlo a Setšhaba
(Auditor-General) o laeditše tahlego ya 24% ya meetse yeo e fihlilgo go R68 milione sehleng
sa mašeleng a ngwaga wa go feta,” a realo. O re go se lekane ga taolo ya melao ya
kgoboketšo ya dikoloto, kudu mafelong ao a hwetšago meetse a go se lefelwe bjalo ka
Mankweng, e ba tlhobaboroko mme se se swanetše go fedišwa.
Mmoleledi wa ANC wa Selete sa Peter Mokaba, Adolf Rapetswa, o re ke nnete gore
makhanselara a ANC a ganne tšhišinyo ya dingangišano. O re tšhišinyo yeo e akanya magato
ao e lego gore a gare a a phethagatšwa mme a gona masepaleng.
“Tšhišinyo ka boyona e swanetše go tla ka dikakanyo tšeo di sego gona. Lebaka la gore ANC
e bone se e le go polotika ke gore DA e nyaka go rwešwa dipataka mešomong ya ANC ya go
matlafatša kabo ya meetse,” a realo.
