MAMOGUDI J. MATEMANE
Thuto ya rena e bothateng! Ke ka lebaka leo e hlagetšego ka tsela ye. Melao ya
kgalemo le tsholo, e beetšwe morutiši a nnoši. Ga go na le wo o amago moithuti,
goba morutwana. Morutiši o saenela molao wa gore a ka se iše ngwana seatla. Ge
a ka o tshela, o tlo seka a ikhunolotše goba a be a je mošomo. Fela ge ngwana a
ka iša morutiši seatla, ga go na le molao wo o mo thibelago. Go no swana le ge a
teile mpša ya go hloka mong.
Morutiši ge a Ieka go kgala ngwana ka mantšu, le gona o sa no o oba. Ba re o a
mo sotla, ka gona ke molato. Morutiši o mo laetša diphošo le mabošaedi a
gagwe, a se hole selo. Ngwana yoo ge a rata, o no mo fotlela goba a yo mmega
batswading. Batswadi ba bowa ba apere morutiši yoo a bego a leka go kgala le
go kgalema ngwana yoo.
Bana ba fetogile swana ya mošate.Wa mo kgala o a oba, wa mo lesa, o a oba. Ge
ngwana a sa dire tšona, molato o rwalwa ke morutiši. Morutiši o fetogile boelelo
bja ditšhila. Tše botse di a mo rona – o swanelwa ke tše mpe feela.
Mola e le gore batho ba matšatši a ba lebeletše tšhelete go feta nnete. Ge
morutiši a ka thetša ngwana wa bona ka phošo, ba tlo mo tšwara go fihla a ba
khupariša tsokwana ya go ba pipa molomo. Mola go bago bjalo, molato o tlo
tšwa ka kgoro gomme tlhokwa tša lala.
Molao ka dikolong o hwile! Kgalemo ga e sa le gona! Go rena boithatelo feela.
Mola e le gore ba bangwe ba barutiši ba, ga ba kgone go laola bana ka
mphatong. Ba bangwe le dithuto tšeo ba rego ba a di ruta, ga ba di kgone. Ka
mphatong ba yela feela go yo tšeiša bana magang. Morutiši wa mohuta wo bana
ba mo rata kudu, gotee le bontši bja batswadi.
Tsela yeo ba hlahlwago ka yona matšatši a, e na le bosodi. Tlhahlo ye ba rego ke
ya on-line, e theošitše maemo a borutiši. Mmušo go nyakega gore o ke o
tsitsinkele maemo a ka šedi e kgolo. Go sego bjalo, re a hlahlatha. Thuto ga se
papadi, e nyaka šedi e kgolo. Morutiši o phasitše Mmetse wa matriki ka level 3
goba 4. O ya go dira borutiši gomme ye nngwe ya dithutokgolo tša gagwe ke
wona Mmetse woo wa level 4. Na re ka re o tseba Mmetse yena yo? Yena o
realo, o bile o ikgantšha ka wona ge a le mo methepeng – Level 4 ruri!
