GALEKGOTHOANE, GaMolepo: Edward Molatela Kgarose wa go tšwa GaLekgothoane
tokologong ya GaMolepo ke rakgwebopotlana wa go tšweletša yokathe ya go dirwa ka
dipotata.
“Kgopolo ya go hlama khamphani ya Kgarose Kgaro ya go tšweletša yokathe ya go bitšwa
‘Pota Yoga’ ke tla re ke e filwe ke modimo. Ke hlohleleditšwe ke gore ke be ke nyaka go
thoma selo se seswa sa go ikgetha sa go ba le phepo. Ke ka fao kgopolo ye e tlilego ka gona,”
a realo.
“Ditlhotlo tšeo ke bilego le tšona e bile go hloka moago wa maleba le didirišwa/ditlabakelo
tša maleba efeela yeo ke taba ya maloba,” a realo.
Kgarose ga a šomiše mokgwa wa setšo go tšweletša Pota Yoga eupša o šomiša saense le
theknolotši. “Yokathe ya ka e fapana le tše dingwe ka gore ke šomiša ditlabakelo tša
moswananoši gore ya ka e be ya go ikgetha. Re netefatša gore re latela melawana ka moka ya
dijo tša go bedišwa ebile re tšweletša ya boleng bja godimo ya go hlweka. Limpopo Agro-
Food Technology Station (LATS) e nthušitše ka go kaonafatša boleng bja yona,” a realo.
O tšwetše pele ka go re “Ke dumela gore e na le phepo ka ge e na le carbohydrate le tše
dingwe. Gabjale re šomiša maswi a diphoofolo ge re e dira go ka gore e ka se lokele batho ba
go se je maswi efeela ge nako e eya pele, re tlo akaretša batho ka moka,” a realo.
“Gabjale re e rekiša feela mo profenseng ya Limpopo eupša re leanong la gore e hwetšagale
Afrika Borwa ka bophara pele ngwaga o fela. Bareki ba rena ba laetša ba e rata ebile ba re
hlohleletša go dira tše dingwe. Ngwageng wo o tlago kgweding ya Mopitlo, ke nyaka go
tsebagatša ditšweletša tše dingwe bjalo ka setlolo sa go dirwa ka dipotato” gwa realo
Kgarose.
“Dipotata tše ke di šomišago ke di reka go balemi ba gae. Se se ra gore ga ba sa na le
kgatelelo ya monagano ya gore ba tla ya go rekiša kae dipotata tša bona.”
Mantšu a gagwe a keletšo le tlhohleletšo go bao ba nago le dikganyogo tša kgwebo ke go re:
“Ge o le rakgwebopotlana, šomiša seo o nago le sona gore kgwebo ya gago e gole”
O hwetšwagala dinomorong tše:074 433 5252 goba etela wepesaete ya gagwe ya
www.kgarose.co.za
