POLOKWANE: Barui ba diphoofolo tša nama e khubedu ba ka ikhwetša ba le kgakanegong
morago ga go phulega ga twatši ya Tlhako le Molomo mafelong a mararo a go fapana mo
profenseng ya Limpopo. Ka morago ga dikgwedi feela profense e ketekile go fedišwa ga twatši
ye, go phulega gape ga phetetšo ya yona go ka gwahlafatša ekonomi ya nama e khubedu.
Kgoro ya Temo le Tlhabollo ya Dinagamagae e re pego ya mathomo e laetša gore twatši ye e
hweditšwe Dileteng tša Vhembe le Waterberg.
Phulego ye e tla ka morago ga ge Limpopo le be le dira maitekelo ao a tseneletšego a go
bušetša maemo a yona go a go se be le twatši ye ka ntle ga mafelo ao a laolwago. Phulego ya
mathomo e hweditšwe metseng ya Kubvi le Makonde ka ntle ga Thohoyandou Seleteng sa
Vhembe ka gare ga lefelo leo twatši ye e šeditšwego kudu. Magato a taolo a ile a tšewa ka pela.
Mmoleledi wa Kgoro, Moshupologo Mothotse, o re phulego ya bobedi e hweditšwe lefelong la
go rekiša diphoofolo go la Vivo. Dinyakišišo di ba bontšhitše gore twatši ye e tšweletše
polaseng ye e lego Alldays masepaleng wa Blouberg. Diphoofolo tšeo di amegago mmogo le
mesepelo ya tšona di ka fase ga taolo ya bahlankedi ba diphoofolo.
“Phulego ya boraro e hweditšwe mafelong a mabedi a Leeupoort le Witklip mo Modimolle-
Mookgophong, Seleteng sa Waterberg. Ditsebi tša diphoofolo di dira dinyakišišo tša saense ya
malwetši gomme di tšere magato a go thibela phatlalalo,” a realo.
Mothotse o re Kgoro e tswaletše mafelo ka moka ao a amegilego, go akaretšwa dipolasa,
mafelo a go fepa diphoofolo le mafelo ao a amanago le tšona. Mosepelo wa diphoofolo tša
maoto a a dingatha, ditšweletšwa tša tšona goba didirišwa tšeo di ka bago le kotsi, di thibetšwe
go šomišwa ka ntle le tumelelo ya bahlankedi ba diphoofolo.
“Balemi ba kgopelwa go bega ka pela ge ba bona dika tša twatši ye go akaretšwa go fiša go go
tšwelego taolong, mare a mantši, go se sepele gabotse goba dintho tše di swanago le dišo
molomong. Balemi ba hlohleletšwa go matlafatša tlhokomelo ya tšhireletšo ya malwetši
dipolaseng tša bona,” a realo.
Twatši ye ga e kotsi go batho eupša e ka gwahlafatša ekonomi ge e ka phatlalala. “Phetetšo ya
twatši ye e ka ba le ditlamorago tše dikgolo go ekonomi, go balemi le lefapa la dikgomo.
Kgoro e kgopela tšhomišano ye e tiilego ya balemi le maloko a setšhaba go thibela phatlalalo
ya twatši ye,” gwa realo Mothotse.
