MOKGADI MONYEPAO
MANKWENG: “Kgaotšo ya mohlagase le theko ya wona yeo e lego godimo, ke tšona di
ntlhohleleditšeng go ba le mogopolo wa go aga setofo se. Kgopolo ya go hlama setofo sa go
šoma ka mahlasedi a letšatši ke tla re ke bohlale bjo ke belegwego nabjo ka gore ga se ka
ithuta tša saense. Le papa o be a le bohlale,” gwa realo Thikhathali Mathivha.
Setofo se se šomiša mahlasedi a letšatši go apea dijo le go bediša meetse. Thikhathali o re se
šoma mosegare ge go na le letšatši fela, ga se šome bošego goba ge go na le maru.
“Ditlhotlo tšeo ke bilego le tšona ke go hloka moago wa go šomela le didirišwa tša maleba.
Ke šomišitše ditšhipi tša dikhutlo (di-angle iron) dipaotu (di-bolt) le dikurufi (di-nut),
sekotlelwana sa sathelaete (satellite dish) le digalase tša go ikgetha. Ke agetše setofo se ka
gae moo go sa bolokegang go bana ka ge ke šomiša dilo tše bogale,” a realo.
“Ke šomiša motšhene wa go phula/ bora (drill) o monnyane le kraentara (grinder) ye nnyane.
Ke hloka motšhene wa go phula o eme (standing drill machine), motšhene wa go sega (cut-
off machine) le motšhene wa go butšwetša moya (compressor) le ge e ka ba e nnyane. Thušo
e se be ya tšhelete feela efela e be thekgo ya gore go dirwe ditofo tše ntši. Ge ditofo di ka
nyakwa ka bontši, nka se kgone go di aga ke nnoši, ke tlo nyaka thušo. Tumo ya ka ke go
thwala batho gore re kgone modiro le bona ba thušege ka go humana mediro,” a realo.
Thikhathali o re go tšere nako e teletšana go aga setofo se ka gobane a be a reka didirišwa ka
bonnyane ka bonnyane a dutše a aga. O re ge didirišwa di le gona, a ka aga tše nne ka beke.
“Go ba le setofo se ga se tshenyo ya tšhelete eupša ke peeletšo e botse ka ge se sa senyege.
Ge batho ba ka se hlokomela gabotse, ba ka se fetišetša le go meloko yeo e tlago,” a realo.
“Mehlare ye batho ba e remang go dira dikgong, e tla šireletšega ka ge setofo se se šomiša
mahlasedi a letšatši ao a sa senyego selo.”
“Baswa ba swanetše go itlhamela mešomo ya bona ka go latela dikgopolo tšeo ba nago le
tšona, ba di godiše. Ge o le motho, o se ke wa inyatša. Le nna mathomong ke be ke inyatša
efela g eke bona tše, ke a dumela gore ke be ke fošitše,’ a realo bjalo ka mantšu a gagwe a
tlhohleletšo.
“Ke ngwadišitše khamphane ya ka, bjalo ke tla kgona go šoma. Go na le protšeke e nngwe ye
ke šomanago le yona, mogongwe nka phetha ka yona ka Dibatsela goba Manthole. Ke
theknolotši e kgolo yeo e tlago fihla lefaseng ka moka,” a realo. Yena o hwetšagala
dinomorong tša: 079 956 0097 le mo go Facebook: Thikhathali Mathivha
