MMEGI WA SEIPONE
MOLETLANE: Ka lebaka la go se tsebe tshepetšo ya molao, batho, kudu bahlologadi ba fela
ba loba mašeleng ao ba a nyakilego go ditheo tša go swana le Sekhwama sa Dikotsi tša
mebileng (RAF) goba thekišong ya dintlo ka lebaka la go utswiwa ga ditšhelete ke boramelao.
Sekhwama sa Potego sa Baphethagatši ba Molao (Legal Practitioners Fidelity Fund [LPFF]) ke
sekhwama seo se hlomilwego ka 1941 Motsekapa, fao Ofisikgolo e sa lego gona. Morero wa
sekhwama se ke go phagamiša go kgona go fihlelela le go ba le tshepo go phethagatšo ya
molao. Boikarabelo bjo bogolo bja LPFF ke go šireletša maloko a setšhaba kgahlanong le go
utswiwa ga ditšhelete ka gare ga diakhaonte tša ‘trust’ ka go tiišetša gore batšwasehlabelo ba
ditiragalo tše dibjalo, ba boetšwa mašeleng a bona ka botlalo le gona ka pela.
“Maikemišetšo a sekhwama sa rena ke go šireletša batho ba tlwaelo bjalo ka nna le wena bao
ba šomago le boramelao. Se ga se sekhwama sa go šireletša boramelao eupša se nepilwe go
šireletša maloko a setšhaba ao a humanago ditirelo go boramelao. Go fa mohlala, ka thušo ya
boramelao, batho ba dira dikgopelo go RAF tša go fiwa mašeleng ka morago ga go amega
dikotsing tša mebileng. Ge batho ba kopane le boramelao ba mahodu, bontši bja mašeleng a go
kgopelwa a utswiwa ke boramelao mola batšwasehlabelo ba humana tšhentšhi feela goba ba se
humane selo. Ge o utsweditšwe ke ramolao, etla go sekhwama go dira kgopelo ya go boetšwa
mašeleng ao o a lobilego. Gape bega ramolao ka pelapela ka morago ga tiragalo e bjalo.
Ramolao yena o tla lebana le Khansele ya Phethagatšo ya Molao (LPC) yeo e tlago šogana
naye,” gwa realo Attorney Motlatsi Molefe, yo e lego Molaodiphethiši wa LPFF, nakong ya ge
a boleladišana le batlakopanong ka Mokibelo wa 02 Phato (Agostose) 2025 holong ya setšhaba
motseng wa Moletlane, Zebediela.
“Sekhwama se aba setifikeiti sa potego ngwaga o mongwe le o mongwe. Motho mang goba
mang yo a rongwago ke wena bjalo ka leloko la setšhaba go go direla se sengwe bjalo ka
agente goba ramolao, ke moromiwa wa gago yo a humanago ditaelo go tšwa go wena. Ge o
tsenya kgopelo, kgopela ramolao go go laetša setifikeiti sa gagwe sa potego sa wona ngwaga
wo o dirago kgopelo ka wona. Dira dinoutsi tša ditlabakelo tša motho yo a go thušago le dilo
tšeo di diregago magareng ga lena. Magareng ga boramelao, go na le mahodu le batho ba
mathaithai. Ge o lemoga bothata, bega bothata bjoo go LPFF wona ngwaga wo bo diregago ka
wona.
“Boramolao ba bangwe ba šomiša go hloka tsebo ga moloko a setšhaba go a radia ka go a
utswetša tšhelete. Go kaone go šoma le boramolao bao ba dulago kgauswi le wena gore o
kgone go ba šala morago gabonolo gore na molato o tla kae. Ge modudi a tseba gore ramolao
yo a rilego ke motho wa mathaithai fela a tšwela pele go mo lefa tšhelete, ge a ka tliša kgopelo
go rena ge mathata a thoma go tšwelela, ka madimabe re ka se mo thuše. Ge molato o fedile,
nyaka tšhelete ya gago ka moka go tšwa go ramelao. Re eletša batho gore ba se ke ba nyaka
dikeletšo ka peeletšo ya mašeleng go tšwa go boramelao ka gore gantši ke fao mathata a
thomago gona. Ge o ka lemoga gore o utsweditšwe tšhelete, o se ke wa dira dipeakanyo le
mahodu gore a tla go boetša tšhelete gannyane gannyane,” Molefe a realo ge a tšwela pele.
Molefe o re sekhwama sa mohuta wo se gona dinageng ka moka ka gore boramelao kudu ba
utswetša bahlologadi. O re bontši bja badiradikgopelo ke ba melato ya thekišetšano ya dintlo,
ba dikalafo tša go dirwa bošaedi le ba sekhwama sa dikotsi tša mebileng. Molefe o re lesolo leo
sekhwama sa gabo se le swerego la go ralala le naga go botša ditšhaba ka modiro wa
sekhwama, le nepilwe go hlohleletša maloko a setšhaba go thuša LPFF go fediša bohodu.
Le ge kopano ye e sa ba ya kgeregelwa ke batho ka bontši, bontši bja batho bao ba tsenetšego
kopano e be e le batho ba baswa bao ba kwešišago ditaba bokaone bao ba ka kgonago go hlahla
le go eletša batswadi ba bona.
