A ke thome ka go itia leopo la borare, Badimo, ke re a ditlhokwa di lale di hloke maoto a go tšhaba. Ke
itia bonyatši go lena bao le hlomphago le go godiša polelo ya segagešo, le e šoga le yona e le šoga. Ke
kgale ke ipshina ka polelo ya segagešo. E nonne ebile e tšhankgetše . Ge o kgwatha Mogobo ka segagabo,
o kgwathile semana! Mohunoto ke moobonuto mo Sepeding. Ga re lebale Badimo ba polelo boAbraham
Serote, ba go fetolela Pebele go Sepedi, boEpafras Mogagabiše Ramaila, morutiši wa mathomo wa
Sepedi Botšhabelo le mongwadi wa dipuku tša Sepedi tša magorogoro. A latelwa ke Joseph Rakoma wa
go tšwa Tzaneen.
Yena o kgobokeditše diema le dika a di betiela ka pukung ya gagwe ya Marema ka Dika, a ngwala le
dipuku tše dingwe. Ge re le gona Botšhabelo, nna le Oliver Kgadime Matsepe le boProfesa SPP Mminele
ra rutwa ke Motlokwa Sepedi, Motšwaraphagadihlobega. Yena ke Makgabo. Polelo ya Segagešo e gola
bjalo ka motho yo a e bolelago. Kgale re be re bolela ka magoro ao a akaretšago maina . Re bolela ka
legoro la Mo -Ba, Mo-Me,Se-Di, bjalobjalo. Bjalo ka gore polelo e a gola, mantšu a mantši a patagana
mo legorong le tee, e lego legoro la ‘Mo’. Bjale magoro ao ga a sa šoma bjalo ka dipshio tša tlou bobedi
ka bobedi. Mo- ke legoro ka bolona. Ba- ke legoro ka bolona. Se- ke legoro ka bolona le akaretša tše
“botse”le tše e sego tše “botse”.
Re re Sekgwari, Seotswa, Setsebi, Seota, Sefofu, Segole bjalobjalo. Diema tša segagešo le dika di re
hlahla gabotse. Ke gopola re hlama mareo a go akaretša mo botong ya Sepedi. Modulasetulo e be e le Dr
Moses Madiba. Ba bangwe e le Prof Porth Mokgokong, Noko Ngoepe, Sepedi Molepo, JL Rammala
gomme nna ke le phejane. Mo bekeng ya go feta re be re kopane, re hlama mareo a mafsa a inthanete le
thekhnolotši ka bophara. Bjale nna ke be ke le mogolo baneng. Re be re hlahlwa ke Mokgadi Mathole wa
Kgoro ya Dipapadi, Bokgabo le Setšo. Re be re etilwe pele ke “kgarebjana” gore re se wele ka leopeng.
Ba bangwe bao ba bego ba katana le namane ye ya mošomo, e be e le Dr Maropeng Victor Mojela yo e
bego e le Morulaganyimogolo wa National Lexicography Unit (NLU), Dr Diphete Bopape yo e lego
mongwadi le Clinical Psychologist, Dr Puleng Nkomo yo e lego mongwadi wa dipuku, Morena Maphuti
Mabala, yo e lego Language Practitioner (UNISA), Morena Masilo Manthata yo e lego Language
Practitioner wa Kgoro ya Dipapadi, Bokgabo le Setšo le Morena Thabo Komana yo e lego setsebitsebi sa
IT seo se sa phopholetšego.
Go be go phethega seema seo se se rego la hlogotšhweu le rutwa ke la hlogontsho maano le sa go re
mahlaku a mafsa a ithekga ka a matala. Mo tlhako ya pele e gatilego, le ya morago e swanetše go gata.
Re setšhaba seo se budušago polelo, le yona polelo e buduša setšhaba. Re sa le tseleng ya go
