MMEGI WA SEIPONE
POLOKWANE: Go malapa a 50 ao a diilago go selaganya Limpopo, Keresemose e tlile ka
pela lenyaga. Go dilete tše hlano (5) tša profense, selete se sengwe le se sengwe se hlaotše
malapa a lesome (10) ao a selago ka la go dutla go holega go lenaneo le. Bjalo ka ‘Papa
Keresemose’, lapa le lengwe le le lengwe le amogeditšwe mpho ya Keresemose ya R5 000 ke
Molekgotlaphethiši wa Kgoro ya Matlotlo a Profense, Mna Kgabo Mahoai.
“Mmušo wa profense o boloka matlotlo a profense pankeng ya Standard. Bjalo ka mmušo,
tšhelete yeo re e išago mo pankeng ye ke tšhelete e ntši yeo e thušago panka go fihlelela
merero ya yona ya kgwebo. Bjalo ka karolo ya tumelelano ya mmušo le panka, re kwane gore
panka e tla neela mmušo R250 000 ngwaga o mongwe le o mongwe bjalo ka karolo ya
boikarabelo bja yona go setšhaba seo e dirago kgwebo ka gare ga sona. Go be go na le
dikgopolo tše mmalwa tša go fapana mabapi le gore na mašeleng a re ka a dirišetša eng.
Mafelelong re ile ra kwana gore, mo nakong ya meketeko le boipshino bja Keresemose, go
tla ba botse ge re ka aroganya mašeleng a magareng ga malapa a 50 ao a topago tša fase gore
le wona a ke a thabe le go ipshina mo nakong ye ya ngwaga. Lapa le lengwe le le lengwe le
humana mpho ya R5000,” gwa realo Molekgotlaphethiši Mahoai ge a thakgola lenaneo le
meagong ya Kgoro mo Polokwane letšatšing la 11 Manthole 2025.
“Le ge e se tšhelete e kaalo, re nagana gore R5 000 ga se ya letšatši la Keresemose feela
eupša e tla thuša malapa a go phetha le merero e mengwe ya bophelo. Bjalo ka mmušo, re
duma ge nkabe re kgona go thuša malapa a mantši go feta mo. Kontraka ya rena le panka ya
Standard ke ya mengwaga e mehlano feela. Re nagana gore matšatšing ao a tlago ge re
tsenela ditumelelano le dipanka, re kgopele mašeleng a go fetanyana a gore lenaneo le le
kgone go thuša palo e kgolonyana ya malapa. Re kgopetše dimasepala go kgabaganya
profense go re thuša ka go hlaola malapa a go itlhakela magareng ga badudi ba tšona gore ba
holege go lenaneo le. Re nagana gore malapa ao a bilego le mahlatse a go humana dimpho
tše, a leboga le go ipshina ka go humana dimpho tša go swana le tše mo nakong ye ya
ngwaga ya go nyakalala le go ipshina,” Mahoai a realo ge a ruma.
Menywanywo ya lethabo e be e le ya go laetša le a mehlagare go malapa ao a bilego le
mahlatse a go humana diR500 dibekenyana pele ga Keresemose. Se e be e le Keresemose
pele ga Keresemose!
