PHALABORWA: Batho ba go feta milione bao ba fetetšwego ke twatši ya HIV ga ba sa
hwetšwa mme se se ra gore ga ba nwe dihlare tša bona. Masepala wa selegae wa Ba-
Phalaborwa o rulagantše moletlo wa ngwaga ka ngwaga wa AIDS Memorial Candlelight
lebaleng la dipapadi la Try Again motseng wa Humulani ka ntle ga Phalaborwa ka Labone, 8
Mopitlo 2025, moo tlhokomelo ya HIV e hlohleleditšwego. Tiragalo ye e be e le monyetla wa
go hlompha le go gopola bao ba lahlegetšwego ke maphelo a bona ka lebaka la HIV/AIDS le
go laetša tšhomišano le bao ba phelago ka twatši ye.
Go laetša pono go ntwa kgahlanong le HIV/AIDS, CEO ya sepetlela sa Maphutha Malatji,
Ngk Sello Rasello, o tšweleditše dipalo tša go belaetša mabapi le batho ba go phela ka twatši
ya HIV bao ba sa hwetšwego ka morago ga go hwetša gore ba phela le yona.
“Palo yeo e ka lekanago 1.1 milione ya batho e nyameletše mo Afrika Borwa ka bophara
mme bontši bja go lekana 48 000 ke bja go tšwa seleteng sa Mopani feela, palo yeo dirago
5% ya palomoka ya naga ka bophara,” a realo.
O re nepo ya bona ya tšhoganetšo ke go hwetša batho ba pele ngwaga o fela. “Go ba buša go
kabo ya rena ya maphelo go bohlokwa kudu go ntwa ya rena ya go fediša HIV,” a realo.
Ngk Rasello o ipileditše go motho mang kapa mang yo a nago le tsebo ya moo batho bao ba
lego gona gore ba ba thuše ka tshedimošo.
Meyara wa masepala wa Ba-Phalaborwa, Merriam Malatji, o re ba thekga kalafo ya HIV
ebile ba kgala gape le dikgaruru tša bong (GBV).
Malatji o netefaditše gape maikemišetšo a masepala a go thekga batho bao ba phelago ka
HIV/AIDS go netefatša gore ba hwetša kabo ya tša maphelo.
“Re hlohleletša bohlokwa bja go nwa dihlare tša twatši ye ka lenaneo ka gore di šoma kudu
go fetša twatši ye maatla mme tša dira gore motho a phele bophelo bjo bobotse. Re
hlohleletša batho bao ba phelago ka HIV/AIDS gore ba latele tšhomišo ya diARV gore ba
kgone go phela maphelo a go hlweka,” a realo.
Ge a be a bolela ka kgolo ya melato ya GBV setšhabeng, Malatji o ipileditše go badudi go
tšweletša setšo sa khutšo, lerato le tlhompho.
“Re kgala ditiro ka moka tša dikgaruru mme re hlohleletša setšhaba gore se šome ka thata go
dira mafelo ao loketšego batho ka moka,” a realo.
