MOKGADI MONYEPAO
MOKOPANE: Nepoworx e tlišitše tsebo ya saense go barutwana ba sekolo sa sekontari sa Nkube.
Nepoworx gammogo le BIC Stationery, FNB, Siemens Energy le Vuwani Science Resource Centre ka
Yunibesithing ya Venda ba tlišitše tsebo ya saense ka lenaneo la bona la #Nepo4change sekolong sa
Nkube leo maikemišetšo e lego go ruta ka STEM (Science, Technology Engineering and
Mathematics) le mešomo yeo e tswalanago le go hlwekiša tikologo (green careers).
“Bontši bja barutwana ba ke mathomo ba ekwa ka mešomo ya theknolotši ya leratadima (tlelaemete)
(careers in climate technology). Ke la mathomo ba diriša diphanele tša letšatši le gona go kgatha tema
lefaseng la kgonthe la saense ka ntle ga lenaneothuto (kharikhulamo). Barutwana ba rena gantši ba
tlogelwa morago ka lebaka la gore re le magaeng. Lehono barutwana ba rena ba ikwa ba lemogwa le
go tutuetšwa go nagana ka bokamoso bjo bobotse. Re holofela gore se ke mathomomayo a thekgo go
barutwana ba rena. Re leboga Nepoworx le badirišane nabo ka lenaneo le le dimpho tša dithušathuto
(stationery) tšeo le di abetšego barutwana,” gwa realo hlogo ya sekolo, Mdi M.P Maluleke.
“Go tloga go dipotšišo le dikarabo tšeo di nago le mafolofolo go ya go dipontšho tša kgonthe tša
saense, ke moo bana ba bilego le phišegelo ya go nyaka tsebo. Go tliša STEM dinagamagaeng ga se
feela tlhabollo ya mešomo (career development) eupša ke toka. Ngwana yo mongwe le yo mongwe o
swanetše go hwetša monyetla wa go ithuta le go hlabolla bokgoni bja gagwe ka saense le theknolotši.
Rasaense wa ka moso a ka tšwa gona mo. Bjale ka ge theknolotši e gola letšatši ka letšatši, go
bohlokwa gore re akaretše batho ka moka. Bana ba swanetše go tseba ka ga mešomo ye e tswalanago
le leratadima,” gwa realo Nonjabulo Sokhela yo e lego molaodi wa Nepoworx.
Afrika Borwa e leka go aga bokamoso bjo bo lekalekanago. Mananeo a bjalo ka #Nepo4change a
laetša gore phetogo ya nnete e thoma ka go bjala peu ya thuto go baswa le go tliša theknolotši go
bohle. Barutwana ba Nkube ba tlogetšwe ba le mafolofolo, ba na le kgahlego le tsebo ya saense. Yo
mongwe wa barutwana o rile: “Ke ithutile gore saense ga se ya batho bao ba rilego – le rena ke ya
rena. Le rena re ka ba bahlami ba theknolotši (inventors), borasaense le boentšeneere,” a realo ka
boitumelo.
