POLOKWANE: Kgoro ya Maphelo mo Limpopo e hlomile letšatši la mathomo la mosepelo
wa patla e tšhweu ka Laboraro la 22 Diphalane 2025. Ye e be e le tiragalo ya tlhokomelo ye e
nepišitšwego go godiša ditokelo, boikemelo le serithi sa batho bao ba phelago le bofofu.
Tiragalo ye e be e le ka tlase ga moeno wo o rego: “Rata mahlo a gago, patla e tšhweu e
bušetša serithi sa gago gobane e netefatša lefelo la gago,” Mosepelo wo o thomile go tloga
SABC Park go fihla Jack Botes Hall mo Polokwane gomme go be go le gona ba mmušo,
batšeakarolo gammogo le maloko a setšhaba.
Tabakgolo e be e le tšhomišanommogo magareng ga Kgoro ya Maphelo le ya Dipapadi,
Bokgabo le Setšo, Masepala wa Polokwane, kantoro ya Tonakgolo le mokgatlo wa
bosetšhaba wa difofu (South African National Council for the Blind – SANCB).
Go laetša botee le kwelobohloko, Molekgotlaphethiši wa Maphelo, Dieketseng Mashego
gammogo le Molekgotlaphethiši wa Dipapadi, Bokgabo le Setšo, Jerry Maseko, ba ile ba
apara dithibamahlo gomme ba sepela ba thušwa ke bagogi gore ba itemogele ka bobona
mathata ao difofu di kopanago le wona letšatši ka letšatši.
Bjalo ka karolo ya lenaneo, Molekgotlaphethiši Mashego o abetše difofu dipatla tše 65 tše
tšhweu e lego karolo ya ditlabelo tše 300 tša didirišwa tša thušo tšeo Kgoro e di rekilego go
thekga batho bao ba sa bonego.
Ge a be a bolela le setšhaba, Mashego o boletše gore patla tšeo ga se seswantšho sa go sepela
feela.
“Ke sešupo sa boikemelo, polokego le serithi tšeo di bušeditšwego go bona. Ge re abela
motho patla, ga re mo abele ka lebaka la go mo swabiša. Re mo abela tokologo ya go sepela,
go ithuta, go šoma le go phela ka serithi,” a realo.
Go bagolofadi ba bantši, letšatši leo le be le na le bokgoni bjo bogolo bja maikutlo.
“Mengwaga e mentši ke be ke ithekga ka batho go mpontšha tsela. Go amogela patla ye go ra
gore nka itshepelela ka boitshepo gape. E bušitše bophelo bja ka morago,” gwa realo
motswadi (47) yo a foufetšego ka 2018.
