GAMOLEPO: Le ge dipego di bontšha gore go na le dika tša go fokotšega ga hlokego ya
mešomo mo profenseng, bontši bja baswa ba Limpopo ba palelwa ke go hwetša mešomo le
ge ba na le bokgoni. Shandalea College yeo e lego motseng wa Makgeng, GaMolepo, ka ntle
ga Polokwane, e thomile lenaneo la mahala leo le ikemišeditšego go netefatša ditsebi tša go
aga tšeo di nago le bokgoni eupša di hloka mangwalo a semmušo.
Molaodi wa sekolo, Cornet Mamabolo, yo a tsebjago kudu bjalo ka la Tbose go tšwa
pontšhotswantšong ya Skeem Saam, o re lenaneo le le tla thuša baswa bao ba lemogago gore
mangwalo goba dithuto feela ga di sa lekane go ba tsenya mešomong mo ekonoming yeo e
thatafetšeng bjalo ka ya rena.
Dipalopalo di bontšha gore go hloka mešomo ga baswa bao ba nago le mangwalo go
fokotšegile go ya go 10.4% ka kotara ya boraro ya 2025 mola Limpopo go theogile go tšwa
go 35% ka kotara ya bobedi go ya go 29.8% ka kotara ya boraro. Tshedimošo ye e šišinya
gore palo ya go bonalanyana ya batho mo Limpopo e kgonne go humana mešomo kotareng
ya boraro. Le ge go le bjalo, Mamabolo o lemoša gore ba bangwe, kudu bao ba dulago
metseng yeo e lego kgole le ditoropo, ba sa itemogela mathata a go se hwetše mešomo.
“Baswa ba bangwe ba na le bokgoni le maatla eupša ga ba na mangwalo a semmušo ao a ka
ba thušago go swana le ba bangwe ge ba hwetša mešomo. Lenaneo la rena le nepile go thuša
batho bao ba nago le bokgoni bja go aga gore ba kgone go humana mangwalo a semmušo ao
a tlago ba thuša go tšwela pele bophelong. Go ba le mangwalo go tla thuša batho gore ba
kgone go tsenela mešomo ya mmušo le ya makala a praebete e megolonyana yeo e tla ba
thušago go gola le go matlafala. Go aga ga se mošomo wo o ka tsogago o fedile ka ge bath
oba tla tšwela pele go aga dintlo le meago e mengwe gomme ge batho ba na le mangwalo a
maleba, seo se ba beya maemong a makaone ” gwa realo Mamabolo.
Sekolo se kgopela bašomi ba go aga go ingwadiša gore ba leke, ba netefatšwe gomme ba be
le monyetla wa go tsena mešomong ya semmušo. Lenaneo la go ingwadiša le thomile ka
Pherekgong 2026. Mamabolo o re ba holofela gore lenaneo le le tla hlahla ditsela tša bophelo
bjo bobotse le go thuša baswa go tsena ekonoming ya naga.
