MARBLE HALL: Badudi ga se ba thabišwe ke balaodi ba Tompi Seleka Agricultural
College. Se se latela ka morago ga ditatofatšo go tšwa go badudi tša go re go na le
kgethologanyo kholetšheng ye go la Marble Hall. Badudi ba re bana ba motho, maloko le
bagwera ba bašomi bao ba lego taolong ba thwetšwe ntle le go latela molao.
Go thwe yo mongwe wa bašomi ba go thwala (HR) o be a le sehlopheng sa go hlokola yo
mongwe wa maloko a gabo yo a thwetšwego. Badudi ba ile ba gwanta ka kgwedi ya Lewedi
2024 kgahlanong le tšwelopele ya kgethologanyo mme se sa dira gore balaodi ba be le
tumelelano le badudi gore mešomo ya maitemogelo a fase e tla abelwa badudi efela se ga se
se direge. Badudi ba re ba nyaka gore balaodi ba kholetše ba rakwe.
College ba rakwe mošomong ka morago ga ditatofatšo tša kgethologanyo
“Bana ba rena ga ba šome ka ge balaodi ba thwala bagwera le meloko ya bona ka ntle le go
latela molao mme se ga se dumelelege.
“Ba kgona go thwala le batho ba go tšwa kgole go swana le seleteng sa Vhembe nakong yeo
e lego gore bana ba rena ga ba šome. Bana ba rena ba dira bosenyi ka gore ga ba šome,” gwa
realo modudi (55).
Badudi ba latofatša gape Kgoro ya Temo le Tlhabollo ya Dinagamagae ka ditiro tša go swana
le tša kgethologanyo. Ba re mosadi yo mongwe wa mošomi ka gare go Kgoro o thwetšwe
ntle le go latela molao. Ba re mosadi yoo o thwetšwe lekaleng le tee moo a ikarabelago go
monna wa gagwe thwii.
Mmoleledi wa Democratic Alliance (DA) mo Limpopo go merero ya Temo le Tlhabollo ya
Dinagamagae, Marie Helm, o re ba kgala ditatofatšo tše kholetšheng ye.
“Re ile go netefatša gore ditatofatšo tše di a nyakišišwa, pego ya fihlišwa go komiti ya Temo
le Tlhabollo ya Dinagamagae gore boikarabelo bo be gona ge e le gore ditatofatšo tše ke
nnete,” a realo.
O re ka ntle ga dingongorego tša badudi, ga ba thekge tšwelopele ya kgethologanyo.
Mmoleledi wa Kgoro ya Temo le Tlhabollo ya Dinagamagae, Moshupologo Mothotse, o re
ba hloka nako go nyakišiša ditatofatšo tše.
