BOLOBEDU: Ntwa ya bogoši bja setšhaba sa Balobedu e bonagala e le kgole le go fela.
Kgošana Lekukela Modjadji wa setšhaba sa Balobedu o re magato a moalo mabapi le go
hlatha yo a tla dulago setulo sa bogoši bja gabo a dirwa ke batho bao ba nyakago go senya
lefa la gabo ebile ba nyaka go tšeya setulo sa bogoši go tšweletša dikgahlego tša bona.
Kgošana Lekukela o be a bolela le boraditaba diofising tša mošate wa Modjadji go la
Khehlakoni ka ntle ga Bolobedu ka Mošupologo, 13 Pherekgong 2025.
O be a boela ka morago ga gore Mopresitente wa naga, Matamela Ramaphosa a kwalakwatše
go amogela ga gagwe ga Kgošigatšana Masalanabo Modjadji bjalo ka Kgošigadi ya Balobedu
semmušo.
Lekulela Modjadji o re ga se ba thabišwe ke sephetho se ka ge se lebeletše lehlakore le tee.
“Tiragalo ye ga e nyatše feela setšo le ditshepedišo tšeo di dirwago ke ba lapa la bogoši ebile
ke go nyefola setšhaba sa Balobedu seo se tsebago gore tshepedišo ya sephetho sa go kgetha
wa go dula setulong e gare ga setšo sa rena,” a realo.
O re yena le ba lapa la bogoši ba tsebile ka sephetho sa Presitente Ramaphosa matlakaleng a
leago.
“Ga se re tsebišwe ka sephetho seo mme le mmušo ga se o boledišane le rena go re hlalošetša
mabaka a sephetho seo. Se se tlogetše ba mošate ba gakanegile,” a realo.
Kgošana Lekukela o re go a nyamiša gore mmušo ga se o bone go le kaone go ba le
dipoledišano tša maleba le yena gammogo le ba lapa pele sephetho seo se ka phatlalatšwa.
“Re nyamišwa ke tsela yeo mmušo o hlokomologago setšo le meetlo ya rena ya go hlatha yo
a ka dulago setulo sa bomma sa bogoši mme wa tšwela pele ka go nyefola sephetho sa lapa la
bogoši seo se tsebešitšwego semmušo ka Moranang 2021,” a realo.
O re sephetho seo mmušo o se tšerego se beile sebopego sa bona kotsing mme go hlatha
Kgošigatšana Masalanabo bjalo ka Kgošigadi ya Balobedu ntle le go ba tsebiša go šikinya
tlhompho yeo e bego e le gona magareng ga mmušo le ba lapa.
Ka ntle le ditiragalo tše ka moka, Kgošana Lekukela o re ga a lwe le moratho wa gagwe,
Kgošigatšana Masalanabo, le ge e le gore go na le bao ba lekago go ba kgaogantšha.
“Ke kgopela fela kgaetšedi ya ka gore a nagane gabotse mme a bowe gae gore re kgone go
lebeledišiša lefa la mma wa rena ka tsela ya maleba,” a realo.
