POLOKWANE: Tonakgolo ya Limpopo, Ngk Phophi Ramathuba, o etetše lefelo la kago ya
bookelo bja Polokwane Academic ka Labone la 25 Lewedi 2025. O be a ile go hlahloba kago
ya projeke e kgolo ya dimilionemilione yeo e tlago go matlafatša phihlelelo ya ditirelo tša
maphelo tša maemo a godimo profense ka bophara. Kago ya bookelo bjo e thomile ka 2023
ka mašeleng ao a fetago R800 milione gomme e hlotše mešomo ye e fetago 1 000. Bookelo
bo beakantšwe go fetšwa ka 2028.
Tonakgolo Ramathuba o be a farafarilwe ke meyara wa masepala wa selete sa Capricorn,
Mamedupi Teffo le maloko a gagwe a lekgotla go hlahloba mešomo ya kago le go boledišana
le batšeyakarolo ka lebelo le boteng (boleng) bja phethagatšo ya modiro. Ramathuba o
amogetše boikgafo bja mmušo go tiiša motheo wa tša maphelo mme a re bookelo bjo bo ile
go tšwela badudi mohola ka tša maphelo.
“Ketelo ye e mphile sebaka sa go bapetša tše di begilwego mo dithulaganyong tša rena le seo
se diragalago mo lefelong le. Se se tla re thuša go tsena gare ka pela ge go na le mathata,” a
realo.
Ba bangwe bao ba bego ba le gona ke Molekgotlaphethiši wa Kgoro ya Mešomo ya Setšhaba,
Ditsela le Mafarahlahla, Ernest Rachoene le Molekgotlaphethiši wa Maphelo, Dieketseng
Mashego gammogo le moemedi wa masepala wa Polokwane, Cllr Joosuf Pemma.
