TZANEEN: Di goeleditšwe dikgopelo tša gore barutiši ba nyakišišwe pele ba ka thwalwa. Se
se tla ka morago ga gore morutiši wa mengwaga ye 53 sekolong sa sekontari sa Zivuko
motseng wa Mariveni ka ntle ga Tzaneen a latofatšwe ka go imiša morutwana wa go dira
kreiti 11. Morutiši yo o latofatšwa gape ka go ba ka gare ga marato a tša thobalano le
barutwana ba bangwe ba bane sekolong se.
Batswadi le badudi ba befetšwe mme ba ipiletša gore go be le dinyakišišo tša go tsenelela tša
go ikema go ditiragalo tše. Ba ipiletša go Molekgotlaphethiši wa Kgoro ya Thuto mo
Limpopo, Mavhungu Lerule-Ramakhanya, gore a tloše morutiši yo sekolong.
Phetola Maake (45) o re o boifa gore morutiši yo o ile go tšwela pele a senya megopolo le
bokamoso bja barutwana.
“Bana ba rena ba ka se bolokege ge morutiši yo a le sekolong. O ile go tšwela pele a robala le
bana ba rena mme a feleletša a ba senyeditše bokamoso bja bona,” a realo.
Ba bangwe ba badudi ba re ba ile go gapeletšega go tšeya magato a boima ge morutiši yo a ka
se tlošwe. “Le ge re tseba gore barutwana ga se ba swanelwa go emišwa go rutwa, re ile go
gapeletšega go tswalela sekolo go fihla Kgoro e tšeya kgato kgahlanong le morutiši yo. Re ka
se dumelele morutiši wa mohuta wo pele ga bana ba rena,” gwa realo modudi (41).
Modulasetulo wa Elizabeth Home Foundation, Elizabeth Shingange, o re polokego ya
barutwana e tla pele.
“Re ipiletša gore go be le dinyakišišo tabeng ye ka gore ga re nyake go bona morutiši yo a
ruta bana ba rena. Ge Kgoro e palelwa, a ba tlogele nna ke dire dinyakišišo ka gore nka kgona
go hwetša dikarabo. Morutiši yo o swanetše go arabela ditiragalo tša gagwe ka gore bana ba
rena ga se ba bolokega pele ga gagwe,” a realo.
Mokgatlo wa Economic Freedom Fighters (EFF) mo Limpopo o ipiletša go lekala la South
African Council for Educators (SACE) gore e dire dinyakišišo ditatofatšong tše mme e fediše
tumelelo ya morutiši yo ya go ruta go netefatša gore a se sa ema pele ga barutwana gape.
Mmoleledi wa EFF, Jacob Lebogo, o rile: “Morutiši yo o swanetše gore a ngwadišwe bjalo ka
mosenyi wa molao go tša thobalano (sex offender). O dirile molato o mogolo wo motswadi a
ka o dirago go bana ba gagwe, ka fao, ga a swanelwa go ema pele ga bana,”
Mmoleledi wa Kgoro ya Thuto, Mike Maringa, o re ditatofatšo tše di nyakišišitšwe efela tša
se netefatšwe. “Ga go na magato a kgalemo ao a tšerwego kgahlanong le morutiši yo,” a
realo.
