MOPANI: Khansele ya Masepala wa Selete sa Mopani e tšere sephetho sa go raka molaodi
wa ditšhelete, Sibongile Mathebula, ka ponyo ya leihlo ka morago ga ditheeletšo tša kgalemo
mabapi le dipelaelo tša boitshwaro bjo bobe bja ditšhelete. Khansele e boletše ka Labobedi,
17 Dibokwane 2026, gore sephetho se se latetše ditšhišinyo tša tshepedišo ya semmušo ya
kgalemo yeo e dirilwego go ya ka melawana ya masepala le melao ya mešomo.
Mathebula o filwe sebaka sa go araba dipelaelo kgahlanong le yena pele go ka tšewa
sephetho sa mafelelo sa go mo raka mošomong. Mmoleledi wa masepala, Odas Ngobeni, o
rile masepala o sa ikgafile go boikarabelo le tšhireletšo ya tšhelete ya setšhaba.
“Khansele e tiišitše boikgafo bja yona go pušo yeo e hlwekilego le boikarabelo. Re tšea
tlhokomelo ya didirišwa tša setšhaba ka šedi gomme re tla tšwela pele go matlafatša magato a
go thibela bofora, bosenyi le taolo e mpe ya ditšhelete,” a bolela bjalo Ngobeni.
O re Khansele e boletše gore go rakwa ga gagwe ke karolo ya boitapišo bja go buša tshepo ya
setšhaba morago. “Lekgotla le lemoša gape gore bašomi bao ba swerego boikarabelo bja
tahlego ya ditšhelete ba tla lebana le ditlamorago. Gabjale go phethagatšwa gape magato a go
matlafatša taolo ya ka gare,” a realo.
Mokgatlo wa Democratic Alliance (DA) masepaleng o boletše gore o amogela sephetho se
eupša o ipileditše gore go tšewe magato a mangwe.
Mokhanselara wa DA, Mahlatswa Ramalepe, o hlohleleditše phethagatšo ya ka pela ya go
kaonafatša taolo ya ditšhelete masepaleng. “Re amogela go fetšwa ga molato wa boitshwaro
bjo bobe bja ditšhelete gomme re ipiletša go Meyara Pule Shayi go thoma ka pela tshepedišo
ya go thwala ka pela molaodi wa ditšhelete yo a nago le mangwalo a maleba,” a realo.
Ramalepe o ipileditše gape go molaodi wa masepala, Tshepo Mogano, go phethagatša taolo
ya ditlamorago kgahlanong le bašomi bao ba akaretšwago tabeng ye le go bea pego ye e
feletšego pele ga lekgotla. O okeditše gape gore mokgatlo wa gabo o tshwenyegile ka gore
makhanselara ga se a hwetša dipoelo ka botlalo tša dinyakišišo. Ga go na taetšo yeo e filwego
mabapi le gore na go rakwa ga molaodi wa ditšhelete go tla ganetšwa goba gore molaodi o
mongwe o tla kgethwa neng.
