GASEKGOPO: Ka Mokibelo wa 4 Diphalane 2025 badudi ba kgobokane lapeng la
Matsorang Sekgopo motseng wa GaSekgopo ka ntle ga Modjadjiskloof go keteka letšatši la
bohwa. Le ge go be go na le ditlhotlo, go akaretša le taelo ya kgorotsheko yeo e thibetšego
morero wa thapelo ye kgolo yeo e bego e rulagantšwe go swarwa lebaleng la dipapadi la
Zebras, moletlo wa go keteka letšatši la bohwa le setšo o ile wa tšwela pele.
Morulaganyi, Matsorang Sekgopo, o re moya wa setšhaba, tumelo le setšo di be di tiile ka
maatla, di bontšha boikokobetšo le boikgantšho. Moletlo wo o tlišitše mmogo maloko a
Magoši-Swaranang Movement, baetapele ba bogoši bja Maake le badudi go tšwa metseng ya
kgauswi. Baeng ba ile ba tšeya karolo ka boikgantšho le lerato ka go ntšha ditšhelete,
didirišwa le nako go kgontšha katlego ya moletlo wo.
“Moletlo wo ke segopotšo sa gore setšo sa rena se phela ka rena, ka go ba mmogo, ka go
tšwela pele le ka mekgwa yeo re e bolokago lebakeng la setšhaba sa ka moso,” gwa realo
Sekgopo. Sekgopo o gateletše bohlokwa bja go boloka setšo, a hlohleletša baswa go ithuta ka
histori ya bona le go tšeya karolo mererong ya setšhaba.
“Go akaretša moletlo wo wa setšo, go be go na le dihlopa tša setšo, dipolelo go tšwa go
baetapele gammogo le menyetla ya go kopanya le go gopotšana boitshepo bja setšhaba,” a
realo.
Moletlo o be o hlahlilwe ka tumelelo le pono ya Sekgopo Matsorang Foundation, yeo e
šomago go godiša tsebo ya setšo, go oketša leago le tlhabollo ya setšhaba ka bophara.
Badudi ba hlalošitše tebogo ya bona gore meletlo ye e tšwela pele go oketša boikgantšho le
go tiiša dikamano gare ga badudi, go netefatša gore setšo sa setšhaba se a bolokwa go tloga
gonabjale go fihla mengwaga yeo e tlago.
