MMEGI WA SEIPONE
Tonakgolo ya Limpopo, Ngk. Phophi Ramathuba, a felegeditšwe ke dikemedi tša
bahlankedibagolo ba mmušo, o etetše mafelo a go fapana seleteng sa Waterberg go iponela ka
noši tshenyo yeo e hlotšwego ke mafula a dipula tšeo di tšhologilego kgauswinyana. Kemedi
ye e be e akaretša Molekgotlaphethiši wa Mešomo ya Setšhaba, Ditsela le Mafarahlahla, Mna
Ernest Rachoene, Meyaraphethiši wa Masepala wa Selete sa Waterberg, Cllr Jack Maeko le
meyara wa masepala wa selegae wa Modimolle-Mookgophong, Cllr Sechele Sibulai.
Ba etetše mafelo ao a rilego ao a amilwego gampe go akaretšwa Wate 12, mmila wa Chris
Hani fao leporogo le sentšwego gammogo le Wate 8, Phomolong, fao tsela e sentšwego.
Ketelo ye e laetša boitlemo bja mmušo bja go šogana le ditlamorago tša mafula le go humana
ditharollo tša go aga leswa le go boetša ditšhaba tšeo di amegilego maemong a go kgona go
tšwela pele ka bophelo.
Gona seleteng sa Waterberg, mafelo a go swana le GaSeleka le ditikologo tša kgauswi le
tšona di amilwe kudu ke mafula. Ge o feta ka tsela ya R572 go tšwa mollwaneng wa leporogo
la Grobler o lebile Lephalale, o be okare tsela e sepela gare ga lewatle. Karolo ya motse wa
GaSeleka ya go bapa le tsela ye e be e kgamilwe ke bodiba bja meetse ka mathoko ohle.
Bogolo bja tsela go tloga GaSeleka go fihla Lephalale go be go bonala maphaaphaa a meetse
ka mathoko ohle a tsela fao dithokgwa di bego di itaetša di bipetšwe ke meetse.
Go se swane le dilete tša Capricorn, Mopani, Vhembe le Sekhukhune fao go nago le meboto,
dithaba le magologelo, ditaetšo ke tša gore bogolo bja selete sa Waterberg ke naga ya go ikala
yeo e se nago meboto le magologelo fao meetse a kgonago go kitima ka lebelo. Mola se se na
meboto le magologelo, selete sa Waterberg se na le dinoka tše dintši tša go ahlama gomme ge
pula e tšhologa ka maatla, meetse a hloka fao a ka elelelago gona ka lebelo. Se se dira gore
bogolo bja selete bo hupe meetse ao a hlokago boelelo nako e telele.
