MMEGI WA SEIPONE
POLOKWANE: “Re kgobokane fa mamohla go thakgola semmušo morero wa go bala matšatši a
go re iša go marathone wa CDM wa ‘tše nne ka go o tee’. Re thakgetše ka gore ngwaga wo re
thakgola lebelo le ka mafolofolo le boikgantšho bja katlego ya rena ya lebelo la 2024. Ka gona,
re mo gape go hlohleletša go kitima ka boipshino le go ala sefala sa gore boramabelo ba
kgotsofatše dinyakwa tša dimarathone tše dikgolo,” gwa realo Meyaraphethiši wa Masepala wa
Selete sa Capricorn (CDM), Cllr Mamedupi Teffo, nakong ya ge a thakgola lebelo ka Labobedi
la 14 Pherekgong (Janaware) 2025 lebenkeleng la difatanaga tša mabonwa mo Polokwane.
“Taba ya mmitša ka lebelo le ke gore le swaretše bohle se sengwenyana – boramabelo ba go no
kgahlwa ke go kitima, boramabelo ba profešinale, bomaithutathutane le babogedi bao ba tlelago
go reta le go hlohleletša bommamoratwa ba bona. Se se dira gore batšeyakarolo ka moka ba be le
letšatši la go ikgetha la mabelo le boipshino. Lebelo le le swaretše mang le mang se
sengwenyana fela go feta tšohle, go na le difoka tša R170 000 go bao ba ratago go itebogiša ka
morago ga go tšwa kudumela. Gape go na le thekete ya go tsenela lebelo la Marathone wa
Comrades go boramabelo bao ba itlhomilego pele bao ba nyakago go ba dikemedi
(diambasatara) tša go phagamiša folaga ya rena go lebelo le legologolo mo Afrika,” Teffo a realo
ge a bapatša lebelo.
“Nepokgolo ya rena ke gore re nyaka go bona go kitima le diatleletiki di eba papadi ya go tuma
dimasepaleng tša rena tša selegae, ditoropong le metsemagae. Re thabišwa ke gore marathone
wo o gotše fao o fetogilego motswadi yo a šušumetšago dimarathone tša boipshino go selaganya
selete. O tsošitše kgahlego ya bosetšhaba go tšwa dileteng le diprofenseng tše dingwe tšeo di
phelago di letile lebelo le ka go tseba gore masepala wo o ka se ba nyamiše. Seo ke seo re lego
sona – legae la botswerere le menyetla,´a realo ka boikgantšho.
Teffo o re mabelo a mengwageng ya go feta e bile katlego e kgolo fao a gokilego boramabelo ba
magareng ga 2 000 le 3000. O lebogile badirišani ba bangwe ba masepala, kudu Polokwane
Athletics Club yeo e thušitšego ka boingwadišo, go ngwala dipoelo le dipeakanyo tše dingwe. O
lebogile gape le Mercurius Motors Polokwane yeo e bapetšego karolo e kgolo bjalo ka mothekgi
go katlego ya mabelo a 2023 le 2024. Masepala o sa lebeletše thekgo yeo ge o eya pele.
“Go boramabelo, re le mema go ba le rena gape. Ge e le gore ga se wa ka wa kitima, bofa dieta
tša gago tša go kitima, o amogele tlhotlo mola o tla ba o kopana le le batho ba bangwe ba go
ipshina ka go kitima. Marathone wo ga se feela taba ya go kitima maeto ao motho a ikgethelago
wona eupša gape le go ipeela dinepo ka ditoro tšeo o sa kago wa nagana gore o ka di fihlelela.
Nepo ya rena ya 2025 ke go goka boramabelo ba 3 500 mme boingwadišo bo šetše bo thomile.
Re mema bohle go ingwadiša. Boingwadišo bja lebelo la 42km esale R300 mola bja 21km bo
okeditšwe ka R10 go ya go R210. Etlang le bao le kitimago nabo, bagwera goba badirišani go
tšeya karolo go lebelo la 2025 ka di15 Dibokwane (Febereware) 2025 lepatlelong la kgale la
Peter Mokaba,” a realo ge a ruma.
