HLOGOTLOU: Maphodisa a mabedi ao a šomago setišing sa Hlogotlou (Monsterlus /
Mostorlose) ka ntle ga Groblersdal a swerwe ka Labohlano, 16 Pherekgong 2026,
ditatofatšong tša bomenetša ka morago ga go amogela tšhelete le go šitiša toka go phethega.
Go ya ka mmoleledi wa maphodisa a Limpopo, Brigadier Hlulani Mashaba, lephodisa leo le
be le filwe boikarabelo bja go nyakišiša molato wa tlhaselo kgweding ya Dibatsela 2024.
Dinyakišišong tša lona le hweditše mogononelwa a na le sethunya seo se sa ngwadišwago
mola se bile se akaretšwa molatong efela la se sware mogononelwa.
“Lephodisa leo le ile la laela mogononelwa go lefa R1 500 gore molato o timatimetšwe. Le
latofatšwa gape ka go šomiša mogala wa molatofatšwa go romela tšhelete ka mokgwa wa
eWallet fao le ilego la tšeya R800 la tlogela molatofatšwa le R700,” gwa realo Mashaba.
O re dinyakišišo di ile tša tswalanya lephodisa leo le molato o mongwe wa go hula. “Ka di17
le 19 Dibatsela 2024, lephodisa leo gammogo le mošomi ka lona ba ile ba nyaka tšhelete go
mogononelwa ka morago ga go mo hwetša a swere lebake bakeng sa go mo swara.
Maphodisa ao a tšere R1 000 go mogononelwa gomme a bowa gape go tšea R1 500 yeo e
šaletšego. Ke fao ba kopanego le dipela di thotha mme ba kgopela thušo maotong. Ba ile ba
leka go tšhaba eupša mohlankedi wa tšhireletšo a ba šala morago mme seo ke sona se dirilego
gore molato o ngwadišwe kgahlanong le bona,” a realo.
Ka morago ga dinyakišišo, maphodisa ao a mabedi a ile a swarwa. Ba tšweletše pele ga
kgorotsheko ya Nebo ka Mošupologo, 19 Pherekgong 2026, ba lebane le ditatofatšo tša
bomenetša le go šitiša toka go phethega.
Mokhomišinare wa maphodisa a Limpopo, Lieutenant-General Thembi Hadebe, o amogetše
go swarwa ga maphodisa ao.
