Molekgotlaphethiši wa Kgoro ya Dinamelwa le Tšhireletšego ya Setšhaba, Violet Mathye, o
hlohleletša badudi ka moka gore ba ntšhe mahlo dinameng ge ba šoma ka tšhelete ya ditlamo
nakong ye ya mafelelo a ngwaga. O re mahodu a šetše a letetše go hlasela dihlopha tša
ditlamo nakong ye e tletšego boipshino. Ka ge ngwaga o fela, makgolokgolo a maloko a
ditlamo ao a bolokago tšhelete, a thomile go ntšha goba go abelana tšhelete yeo ba e
bolokilego ngwaga ka moka.
Molekgotlaphethiši Mathye o re kgwedi ya Manthole ke nako yeo mahodu a šomago kudu ka
ge a šala morago batho go tšwa mafelong a go boloka tšhelete le di-ATM gore a ba hlasele ge
ba fihla malapeng a bona.
“Re tsene nakong e kotsi moo batho ba ntšhago dikabelo tša ditlamo tša bona. Mahodu a
lebeletše ebile a hlasela ka ponyo ya leihlo. Re kgopela setšhaba go šetša le go se sepele le
tšhelete e ntši ka mmeleng,” gwa realo Mathye.
Mathye o hlohleletša maloko a ditlamo gore a šomiše ditsela tšeo di bolokegilego tša go
abelana tšhelete, kudu ka go šomiša phetišetšo ya tšhelete ka diakhaonto. O ba hlohleleditše
gore ba se ke ba phatlalatša matšatši a go kopana goba mafelo a go abelana tšhelete ka ge
tshedimošo yeo gantši e fihla diatleng tša mahodu.
O kgopetše gape badudi gore ba ntšhe mahlo dinameng ge ba tsena goba ba etšwa mafelong a
go boloka ditšhelete mme ba tsebiše maphodisa ge ba bona mesepelo ya go belaetša.
“Re nyaka gore motho yo mongwe le yo mongwe a fetše nako ya boipshino a bolokegile. A
re šomeng mmogo ka šedi, re be le boikarabelo le go boloka tšhelete yeo re e šometšego ka
thata,” Mathye a realo. Badudi ba kgopelwa go bega bosenyi maphodiseng go 08600 10111.
