MOPANI: Meyaraphethiši wa masepala wa Selete sa Mopani, Cllr Pule Shayi, o kgopetše
baetapele ba setšo gore ba tšee karolo e maatla go rarolla bothata bjo bo oketšegago bja
tlhokego ya mešomo go baswa. O re maatla a bona le didirišwa tša setšo di ka thuša kudu go
tsošološa ekonomi ya magaeng. Shayi o be a bolela nakong ya kopano ya leano ya baetapele
ba ntlo ya selegae ya magoši le Khoi-san go la Mopani moo a gateletšego gore bohwa bja
setšo bo ka šomišwa go hlama mešomo le ditsela tša go iphediša.
“Re na le lehumo la bohwa bja setšo leo le ka šomišwago go hlabolla ekonomi go thoma ka
temo, boeti gammogo le bokgoni bja go bopa, go betla, go thala diswantšho, go dira dipheta,
go roka le tše dingwe. Ge re godiša makala a, re ka hlola mešomo yeo e tšwelago pele mola
re boloka le setšo sa rena,” Shayi a realo.
O boletše gape gore ga go leano la phetogo ya ekonomi leo le ka atlegago ntle le tšhomišano
ya baetapele ba setšo. O hlalositše gore baetapele ba setšo ke karolo e bohlokwa go tsenya
ditšhaba tša magaeng ka gare ga ditshepedišo tša tlhabollo.
“Ka maele le thekgo ya lena, re ka kgona go bula menyetla yeo e sa tsenwago magaeng, ra
lwa le tlala, ra fediša mohlako gomme ra fokotša phapano ya tekatekano. Mathata a
diphetogo tša ekonomi ga se selo seo se lego ka ntle ga maikarabelo a lena bjalo ka ntlo ya
selegae ya magoši,” a tšwela pele ka go realo.
Shayi o boletše gore masepala wa bona o šoma le balekane ba bantši go thuša baswa. Se se
akaretša tšomišanommogo le Limpopo Connexion yeo e ikemišeditšego go hloma terata ya
inthanete magaeng le metseng yeo e hlabologago go thuša go fediša kgethologanyo ya go
fihlelela theknolotši ya dikgokagano.
“Go ba le inthanete ya go tshepega ke selo se bohlokwa go ekonomi ya lehono,” a realo.
Masepala o saenile gape tumelelano le National Youth Development Agency (NYDA)
gomme o beetše ka thoko R2 milione go thekga mananeo a tlhabollo ya baswa ka tšhomišano
yeo.
