Moletlo wo ga se wa kopanya basadi feela eupša o utolotše tše ntši tša ditsela tšeo basadi ba
di sepelago. Gape o file basadi sebaka sa go bolela ka ditiragalo tše dibotse le tše bohloko
tšeo ba di sepetšego maphelong a bona. Godimo ga moo, e bile sebaka se sebotse sa gore
basadi ba kgone go tsebana le go amogelana gore ba kgone go tsoša setswalle goba segwera.
Ge a bolela ka moletlo wo, Karabo Mahlodi o rile: “‘Sisterhood Talk’ ke lenaneo la go thekga
basadi leo le nepilego mafapa a go akaretša tirišano ya dikgwebo, maphelo le leago, thuto le
tlaišego ya basadi. Se se hlohleditšego go hloma lenaneo le ke gore mošomo wa ka ke go fa
basadi maele le thekgo ya selegae ge ba na le mathata. Ke kgwathegile ka tšeo ke di bonego
le tšeo ke di kwelego mabapi le mathata ao basadi ba kopanago nawo. Ke rata go bona basadi
ka bophara ba kgona go ntšha seo se lego mafahleng a bona, ba bolele ka mathata a bona gore
ba kgone go imologa dipelong. Ka go bolela ba tlo kgona go hwetša thušo setšhabeng gomme
ba efoga kgatelelo ya monagano.”
Mpho Malatji yo a tsebegago ka bogaši go seyalemoya, e bile moswaramarapo wa letšatši.
Yena o boletše ka matatha ao ba kopanego nawo ka ka bolwetši bjoo a nago le bona bja go
ama lerapo la mokokotlo. O rile: “Ke phetše lebaka le letelele, go tloga mephatong ya
praemari ke tshwenywa ke lerapo la mokokotlo. Bolwetši bjo bo gwahlafaditše mmele wa ka
go fihla moo batho ba bego ba mpolela gampe. Le nna ka sebele ke be ke ikwa okare ke tla
loba bophelo nako efe kapa efe eupša Modimo a mphološa.” Malatji o thabišwa ke go fola ka
morago ga go tšea lebaka la mengwaga ye tshela ka gare ga bolwetši.
Go bao ba bego ba tsenetše moletlo go akaretšwa morulaganyi wa moletlo, Karabo Mahlodi,
My girl Hatu Ramunengiwa yo e lego mmakgwebo wa go roka, Gino Lithole yo e lego
mmasebotsana le diboledi tša go akaretša Mtšana Ratau, Coach Shazie, Reabetswe Moloto le
Bokang Rapatsa.
