Kgoro ya Dinamelwa le Tšhireletšego ya Setšhaba mo Limpopo e swere dinamelwa tša go
feta 50 tša go rwala barutwana mo matšatšing a mabedi a mathomo a lesolo la letšatši la
polokego ya go boela dikolong. Molekgotlaphethiši, Violet Mathye, o tiišitše ntwa ya Kgoro
ya gabo le baotledi bao ba sa latelego melao le bao dinamelwa tša bona di sa lokelago mebila.
Ka Labone, 15 Pherekgong 2026, dinamelwa tše 24 di swerwe Polokwane nakong ya
phuruputšo ya go lekola tlhokomelo godimo ga tumelelo ya go rwala barutwana. Tiragalo ye,
yeo e bego e etilweo pele ke Molekgotlaphethiši Mathye e tlošitše senamelwa se tee mmileng
mme mootledi yo mongwe a hwetša lengwalo la kgalemo ka lebaka la go rwala banamedi ka
senamelwa sa go rwala merwalo.
Mathye o re kgoro e ikemišeditše go šireletša barutwana ka morago ga dipego tša gore
barutwana ba bangwe ba gapeletšwa go sepela sebaka se setelele ka maoto nakong ya ge
baotledi bao ba sa latelego melao ba leka go tšhaba go swarwa.
“Re a tshwenyega ge barutwana ba tlogelwa ba sepela ka maoto ka ge baotledi ba kgetha go
se latele molao. Batswadi ba swanetše go netefatša gore bana ba bona ba sepetšwa ka
dinamelwa tše di bolokegilego le tšeo di nago le tumelelo ya maleba,” a realo.
Mathye o hlalošitše gore senamelwa sa go rwala barutwana se swanetše go ba maemong ao a
loketšego tsela, se be le tumelelo ya go rwala barutwana, se se nametše barutwana go feta
palo, se bonagale gore se rwala barutwana, se latele melao ka moka ya tsela ebile mootledi a
be le PrDP.
Ka Labohlano, 16 Pherekgong 2026, lesolo le ile la tšwela pele masepaleng wa Mogalakwena
go la Waterberg moo dinamelwa tše dingwe tše 28 di swerwego. Tše 10 di swerwe ka Labone
mme ka Labohlano gwa swarwa tše 18 go iša palomoka ya tšeo di swerwego go fihla go 52.
Le ge go le bjalo, lesolo le utolotše mathata a go swana le go diega ga ditumelelo tša go rwala
barutwana le tlhaelelo ya tsebo magareng ga baotledi. Ka lebaka leo, Mathye o tshepišitše go
boela Waterberg go kopana le baotledi go ba hlalosetša ka tumelelo le go rarolla mathata ao
ba ka bago ba na le wona.
“Re lemoga mathata a bona gomme re ikemišeditše go šoma le bona. Efela polokego ya
barutwana e tla pele ga tšohle,” gwa realo Mathye. O tshepišitše gore lesolo le le tla ralala le
profense ka bophara.
