NKOWANKOWA: Badudi bao ba tshwentwago ke tlhokego ya meetse lebaka la go feta
mengwaga e meraro, ba re ba lapile. Ba re seemo sa bona se ama fela mmila wa bona wa
Bombo go la Nkowankowa ka ntle ga Tzaneen, efela badudi ba mebila ye mengwe ya
kgauswi ba hwetša meetse bošego le mosegare.
Sa go makatša badudi ke gore ke mmila wa bona feela wo o hlokago meetse mola mebila e
mengwe e hwetša meetse. Ba re ka dinako tše dingwe ge ba na le mahlatse, ba hwetša meetse
iri e tee ka letšatši.
Sagwati Mhangwana (32) o re seemo se befile le go feta. “Re na le kgaotšo ya mohlagase
letšatši ka letšatši magareng ga iri ya bohlano le ya bošupa mesong mme re hwetša meetse
magareng ga iri ya bošupa go fihla ka iri ya lesome. Ye ke nako yeo bontši bja badudi ba lego
mešomong. Ka lebaka la se, ba bangwe ba badudi ba palelwa ke go hwetša monyetla wa go
kgelela meetse. Re gapeletšega go reka didirišwa tša go boloka meetse tšeo di bitšago
mašeleng a godimo,” a realo.
O re ga a tsebe gore bothata bo hlolwa ke eng ka gore lefelo la bona ga le na mathata a
tlhokego ya meetse.
“Letamo la rena le na le meetse a go lekana 80% efela re palelwa ke go hwetša meetse ntle le
kgaotšo. Re palelwa ke go dira tše dingwe tša bophelo ka gore re hloka meetse ebile re ka se
phele ntle le wona. Re nyaka thušo,” a realo.
Ba bangwe ba badudi ba re ba ile ba belaela go bašomi ba masepala wa Greater Tzaneen
mme ba botšwa gore go na le bothata bja phaephe yeo e išago meetse lefelong la bona.
Maemo a a ile a senyega go ya pele, badudi ba thoma go hwetša meetse gabedi goba gararo
ka beke. Ka dinako tše dingwe ba kgona go fetša matšatši a mane ntle le go hwetša meetse.
Badudi ba re ba dumela gore go na le motho yo a ba senyetšago goba ba otlelwa phošo yeo
ba sa e tsebego.
“Ga re bone lori ya meetse ya masepala mmileng wa rena. Dikolo ke gona di bulwa mme
bana ba rena ba palelwa ke go hlapa. Se se iša boitshepo bja bona tlase ka gore ba
gapeletšega gape go bušeletša diaparo tša bona tša sekolo tšeo di nago le matšhila,” gwa realo
Sheila Ngobeni (39).
Mmoleledi wa masepala, Neville Ndlala, o re ba a tseba ka mathata a meetse ao badudi ba
felago ba kopana le wona. “Re rometše bašomi ba rena lefelong leo efela ba hwetša go na le
meetse, re sa tsebe gore mohlomongwe seemo se se ka ba se tshwenya malapa ao a
ikgethilego na,” a realo.
