TZANEEN: Batswadi ba tshwenyegile ka dithuto tša bana ba bona. Se se tla ka morago ga
gore barutwana ba kreiti 10, 11 le 12 sekolong sa godimo sa Scotch Maboko ka ntle ga
Tzaneen ba hloke morutiši wa thuto ya Geography dikgwedi tša go feta tše 8.
Se se tla ka morago ga gore morutiši wa bona a ye maikhutšong a bolwetši (sick leave) ka
kgwedi ya Mosegamanye 2024. Batswadi ba tshwenywa ke gore bana ba bona ba ka se
tšwelele gabotse dithutong. Ba re e bile mahlatse gore bana ba bona ba kgone go tšwelela
ditlhahlobong tša mafelelo a ngwaga wa 2024.
“Re tshwenyegile kudu ka bana ba rena ka gore ga re tsebe gore ba dira eng ka nako ya thuto
ya Geography. Re nyaka go kwešiša gore ke ka lebaka la eng go se gwa dirwa selo go nyaka
morutiši wa moswaredi dikgwedi tše ka moka,” gwa realo motswadi (46).
Yo mongwe wa batswadi o re se ke sešupo sa gore boetapele bja sekolo gammogo le Kgoro
ya Thuto mo profenseng ya Limpopo ga ba na taba le thuto ya bana ba bona.
“Se sengwe se be se swanetše go ba se dirilwe ka morago ga go lemoga gore morutiši yoo o
maikhutšong nako e telele. Morutiši wa lebakanyana o be a swanetše go ba a thwetšwe ka
gore bana ba rena ba šalela morago,” gwa realo motswadi (40).
Ba re ba be ba nagana gore morutiši yo mongwe o tla tlišwa ka kgwedi ya Pherekgong 2025
efela gwa se direge selo. “Gabjale re kotareng ya mathomo ya dithuto. Ga re tsebe gore re
direng gore Kgoro e šetše matshwenyego a rena ka gore barutwana ga se ba swanela go fetša
lebaka la beke ba se na morutiši,” yo mongwe wa batswadi a realo.
Ba re ge ba bolela matshwenyego a bona, hlogo ya sekolo e ile ya tla ka mogopolo wa dithuto
tša tlaleletšo moo morutwana yo mongwe le yo mongwe a swanetšego go lefa R200 yeo
batswadi ba rego ga ba nayo ka ge bontši bja bona ba sa šome.
“Re ile go e hwetša kae tšhelete yeo ka gore ga re šome? Ga se phošo ya rena gore bana ba
hlokile morutiši dikgwedi mme sekolo se sa dire selo,” gwa realo motswadi (37).
Mmoleledi wa Kgoro ya Thuto profenseng ya Limpopo, Mike Maringa, o re morutiši yo go
bolelwago ka yena o hlokofetše mathomong a kgwedi ya Hlakola 2025.
“Re tshepedišong ya go thwala morutiši yo mongwe mme barutwana ba ile go ba le morutiši
mo nakong yeo e sa fedišego pelo. Taba ya go lefela R200 ga se nnete,” a realo.
