MMEGI WA SEIPONE
SENWABARWANA: Mokibelo wa 1 Dibatsela (Nofemere) e be e le letšatši la go fiša. Holo
ya Kholetšhe ya TVET ya Senwabarwana e be e kgabile ka mebala ya go fapana ya go
kganya ya selemo. O be o ka re dihlopha tša go fapana tša mmino di be di leka go phadišana
gore na ke bomang ba aperego gabotse go phala bohle. Moya go be go foka wa lethabo le
boipshino. Morero wa letšatši e be e le go kgora ditsela tša go leba go moletlo wa setšo wa
ngwaga ka ngwaga wa Mapungubwe.
“Nakong ya ge re thwalwa bjalo ka maloko a Khansele ya Limpopo ya Bokgabo le Setšo
(LACC), Molekgotlaphethiši (MEC) wa Kgoro, Mna Fumani Maseko, o re file taelo. Taelo
ya gagwe e bile ya gore re kopanye setšhaba sa badiragatši ba bokgabo le setšo gore ge ba
bolela ba kgone go bolela ka lentšu le tee. Le ge mohlomongwe wo o lebelelela bjalo ka
modiro o bonolo, ke modiro o mothata. Ge o bolela ka badiragatši ba bokgabo le setšo mo
Limpopo, o bolela ka diketekete tša batho tšeo di akaretšago diopedi, badiragatši ba terama,
babetli le bathadi ba diswantšho, bangwadi, direti, borametlae le ba bangwe. Gape ge o bolela
ka bokgabo le setšo, o bolela ka Magoši ao e lego barwadi le bašireletši ba bokgabo le setšo.
Seo MEC a rego re se dire bjalo ka LACC, ke go kopanya bakgathatema ba ka moka gore re
kgone go bolela ka lentšu le tee. Ge ke tsena mo, ke bone sehlopha sa bana … bana ba
bannyane ba bina dinaka. Go a kgahliša go bona bana ba bina dinaka! Se se šupa gore setšo
sa rena se ka se hwelele gonabjale. Se se ra gore go na le se sengwe seo re se dirago gabotse,”
gwa realo Mna L Mothoa yo e lego leloko la boto ya LACC ge a ntšha mantšu a thekgo.
Le e be e se letšatši la dipolelo tše ditelele. Dipolelo tšeo di bilego gona mathomong a
lenaneo e be e le tše dikopana. Dipolelo di be di fologetšwa ka mmino wa setšo le mebino e
mengwe, borametlae le badiragatši ba terama.
Ge a bolela legatong la Meyara yo a bego a se gona, Meyara wa letšatši, Cllr Mosena, o rile:
“Bjalo ka Masepala, re thakgetše e bile re leboga kudu ge re kgethilwe go ba benggae ba
tiragalo ya Mapungubwe ya selete. Re na le bokgabo le setšo se sentši kudu mo Blouberg. Go
swarela moletlo wo mo go rena, go tla re thuša go laetša talente e ntši yeo re humilego ka
yona mo gae. Re duma gore mmušo o beeletše tšhelete e ntši go merero ya bokgabo le setšo
gore re kgone go gola bjalo ka badiragatši le setšhaba se. Re duma gore Kgoro (DSAC) e
hlome ofisi mo masepaleng gore re kgone go humana ditirelo ka bokgauswi. Masepala o
kganyogela badiragatši letšatši le lebotse,” a realo.
Bogolo bja letšatši, batlamoletlong ba hlwele ba opela le go bina mebino ya go fapana ya
setšo. Barutwana ba Sekolo sa go Ikgetha sa GH Frantz ba ile ba laetša meragelo ya bona ka
go bina ka ditulo tša go thetha (wheel chairs). Bao ba bilego gona tiragalong ba hlwele ba
ipshinne.
