SESHEGO: Mokgatlo wa Economic Freedom Fighters (EFF) o atlegile go boloka boetapele
bja wate 13, Seshego ka ntle ga Polokwane.
Le ke legae la moetapele wa mokgatlo, Julius Malema.
EFF e fentše dikgetho tše ka go fenya African National Congress (ANC), South African
Communist Party (SACP), All Citizens Party (ACP), le Labour Party of South Africa.
Moemedi wa EFF, Mongatane Ramaphoko, o hweditše palo ye kgolo ya dikgetho tše 3 370
(57.34%). ANC e latetše ka moemedi wa yona, Mokgadi Boloko, yo a hweditšego 2 404
(40%). SACP e hweditše 70 (1%), ACP ya hwetša 23 (0.39%), mola Labour Party e hweditše
tše 10 (0.17%) fela.
Go batho ba 11 704 bao ba ngwadišitšwego go kgetha, ke 5 877 fela bao ba kgethilego. Go
bile le dikgetho tše 39 tšeo di sa balwago, gomme palo ya batho bao ba kgethilego e bile 5
916.
EFF e tšwela pele go laola wate 13, yeo ba e tšerego go ANC ka 2016. Mongatane
Ramaphoko tšeya mošomo wo go tšwa go Mafiwa Leballo, moemedi wa EFF wa pele yo a
ilego a rakwa ke khansele ya Polokwane ka lebaka la go se be gona diphuthegong tše seswai
ka tatelano.
EFF profenseng ya Limpopo e boletše gore phenyo ye e bontšha tshepo ye setšhaba se nago
le yona mokgatlong. “Phenyo ye ke bohlatse bjo bo kwagalago bja tshepo yeo setšhaba se
nago le yona mo go EFF gore re tla emela mathata a bona gomme ra tliša diphetogo tša
nnete,” wa realo mokgatlo.
Ka lehlakoreng le lengwe, mmoleledi wa ANC Seleteng sa Peter Mokaba, Adolf Rapetswa, o
bontšhitše lethabo ka thekgo yeo ANC e e hweditšego kudukudu mo mafelong a Extension
127, 133 le 134.
“Se se bontšha gore baagi ba bantši ba ikemišeditše go bona ANC e buša wate ye,” a realo.
