MMEGI WA SEIPONE
PALEDI, GaMothapo: Ga se maru feela ao a bego a emaema a bile a šošobantše sefahlego mesong ya
Labone la 22 Pherekgong 2026 – setšhaba sa GaMothapo le sona se be se emaema, se thuntšha muši
ka dinko. Pefelo ya setšhaba e be e lebišitšwe kampa ya Kgoro ya Mešomo ya Setšhaba, Ditsela le
Mafarahlahla yeo e hlomilwego Motseng wa Paledi. Setšhaba sa Bakgaga seo se bego se etilwe pele
ke mongmabu ka sebele, Kgošigadi Moremadi Mothapo, se hlwele se tswaletše mejako (heke) ya
kampa ye fao go bego go se na wa go tsena goba go tšwa ka kampeng.
“Kampa ye esale e hlongwa mehleng yela ya mmušo wa Lebowa bjalo ka lefelo leo dikgerekgere tša
mmušo di dulago gona gore di kgone go thuša batho ka sekgauswi. Dikgerekgere tša mmušo le
bašomi ba wona ba dula ka mo. Taba yeo e ferihlilego setšhaba se maikutlo ke gore re bona
dikgoratsela re ralala gohle mo …di eya GaMolepo … di eya Sebayeng le mafelong a mangwe go ya
go lokiša ditsela fela ga re bone ditsela tša mo GaMothapo di lokišwa. Rena re no ba feela setšhaba
seo dikgerekgere di dulago go sona fela re se na ditsela mola ka mehla dikgerekgere di etšwa go ya go
kgorela mafelo a kua thoko?” gwa realo Kgošigadi a thuntšha muši ka dinko.
“Taba yeo e befedišitšego setšhaba se ke gore balaodi ba Mmolo wa Paledi ba ile ba ithaopa go thuša
go lokiša ditsela bjalo ka karolo ya seabe sa bona sa ‘boikarabelo bja leago’ (social responsibility).
Kgoro e thibetše bao ba Mmolo go re direla ditsela … ya re ditsela ke tša yona fela še ga e kgone go
re lokišetša ditsela tšeo. Go thušang go ipetha dikgara o re ditsela ke tša gago mola o sa kgone go di
hlokomela? Rena re be re gopola gore ka gore dikgerekgere di mo go rena, ge di thoma go lokiša
ditsela, di tla thoma ka rena fela kae … ke tše di kgankga naga ye ka moka mola rena di sa re thuše ka
selo. Setšhaba le barutwana ba a hlaka ka go latelela dinamelwa kgole ka gore dithekisi di gana go
tsena ka gare ga motse ka lebaka la ditsela tša go senyega. Ge pula e nele, ga re kgone go tšwa goba
go tsena ka mošate ka lebaka la bodiba bjo bo hlolegago pele ga sefero sa go tsena. Ka mo,
dikgerekgere di dutše mo go rena fela re no di bona ka mahlo.
“Ye nngwe taba yeo e befedišitšego setšhaba se ke gore re tseba lefelo le re le file ba Kgoro ya
Mešomo ya Setšhaba le bašomi ba yona. Re maketše ge re fihla mo mesong ya lehono ge re botšwa
gore go na le bašomi ba Kgoro ya Selegae bao ba dulago fa … taba yeo rena re bego re sa e tsebe. Ga
re tsebe gore na bašomi ba ba a lefa le gore ge e le gore ba a lefa, ba lefa mang le gona bokae. Taba
yeo re e lemogago ke gore lefelo le le fetogile lefelo la bodulo esego la mošomo bjalo ka ge rena re be
re nagana. Ba ba lego ka mo gare, ba tla no dula gona ka fa ka gore ga re tloge fa re lego gona. Re
nyaka gore MEC goba Tonakgolo a tle mo go tla go re botša gore na go diregang. Setšhaba se se
nyaka go tseba gore na ditsela tša rena ba GaMothapo di tlile go kgorwa neng? Gape setšhaba se
nyaka go tseba gore na mola re re lefelo le le dirišwa ke ba Kgoro ya Mešomo ya Setšhaba, na ba
Kgoro ya Merero ya Selegae le ba bangwe ba nyakang ka mo re se ra tsebišwa selo?” Kgošigadi
Mothapo a realo a fufula.
“Nna ke šoma kgauswi le ba mmušo … MEC o tseba seo se diregago mo gonabjale ka gore ke
boledišana naye ka mogala. Ke kgolwa gore re tla kwana ka dipolelo le ba mmušo. Ge re ka se kwane,
setšhaba se tšere sephetho sa gore gona re tla kgopela mmušo go re tšwela ka difate. Re ka se kgone
go dula le dikgerekgere mo mola di sa re hole ka selo etšwe di thuša batho bao ba dulago kgole
natšo,” Kgošigadi a realo ge a ruma.
