POLOKWANE: Mothopo wa kgwebo wa Hollywood o ketekile moletlo wa boraro wa Bambelela
Business Awards mo Limpopo. Moletlo wo o swarwa ngwaga ka ngwaga gomme o nepile go thuša
borakgwebopotlana (SMME) ka mašeleng, kudu tšeo di itekago ebile e le tša metsemagaeng. Šedi e kgolo
e lebešitšwe go dikgwebo tša go tšweletša dilo, tša boeti, tša go šoma meepong le tše dingwe. Moletlo o
be o swaretšwe hotelengtsoko ya manobonobo mo Polokwane mola pontšho ya ditšweletšwa tša
borakgwebo e dirilwe holong ya masepala wa Polokwane ya Jack Botes.
Moletlo o gagabile matšatši a mararo gomme gwa kgethwa bathopasefoka ba masomepedi (20).
Go bona, ba lesomešupa (17) ba abetšwe diranta tše dikete tše masome a mane (R40 000)
mongwe le mongwe. Bathopasefoka ba bararo ba ngwaga wo, bjalo ka bathopadifoka, ba filwe
mašemong a godingwana. Mothopasefoka wa pele e lego ba Serage Holdings (Pty) Ltd ba
hweditše diranta tše dikete tše lekgolomasometharo (R130 000), wa bobedi e lego ba Wozilex
(Pty) Ltd o hweditše diranta tše dikete tše lekgolo (R100 000) mola wa boraro yena a tšwele ka
diranta tše dikete tše masomešupa (R70 000).
“Re na le magoro a mabedi a baphenkgišani – baipapatši (pitchers) bao ba bapatšago dikgwebo tša
bona ka go hlalosa gore na di dirang le babontšhi (exhibitors) bao ba laetšago ditšweletšwa tša bona gore
di bonwe ka mahlo. Seo baahlodi ba bego ba se lebeletše go baipapatši ke dintlha tše nne. Ntlha ya
mathomo ke gore na kgwebo e dira mašeleng na. Ntlha ya bobedi ke maatla a sehlopha … na sehlopha se
bopša ke bomang, ba dira eng ka gare ga khamphane, tsebo le boitemogelo bja bona. Ntlha ya boraro re
be re nyaka go tseba khuetšo ya kgwebo goba khamphane setšhabeng. Taba ya khuetšo setšhabeng ke
ntlha e bohlokwa yeo e rwelego meputso e mentši ka gore re bona ntlha ye bjalo ka tsela ya Hollywood
Foundation ya go ama maphelo a batho setšhabeng. Ntlha ya bone ke go kwa ka ditšweletšwa goba
ditirelo tšeo khamphane e di tšweletšago le go di rekiša,” gwa realo Mna Simo Vilakazi yo e lego
Molaodi wa Sehlopha sa Ditirelo (Portfolio Manager) wa Hollywood Foundation.
“Go babontšhi le gona re be re lebeletše dintla tše nne. Ntlha ya mathomo re be re lebeletše tebelelego le
maikutlo ao a tsošwago ke pontšho. Re be re lebeletše gape tsebo le kwešišo ya baphenkgišani ya
dikgwebo tša bona. Ntlha ya borarro re be re lebeletše maatla a sehlopha seo se bopago khamphane. Go
swana le go baipapatši, ntlha ya bone re be re lebeletše khuetšo ya khamphane go setšhaba seo e šomago
ka gare ga sona. Re bone dikgwebo tša ditšweletšwa le tša go aba ditirelo tša maemo a godimo. Re
ipshinne, re kgotsofetše ebile re thabišitšwe ke tšeo re di bonego. Diphadišano tša rena e bile katlego e
kgolo! Re lebogiša bao ba thopilego difoka empa re leboga ka moka bao ba tšerego karolo. Re bone
borakgwebo go tšwa profenseng ka bophara. Re duma gore ngwaga wo o tlago re be le batšeakarolo ba
bantši go feta mo,” Vilakazi a realo ka lethabo.
