MMEGI WA SEIPONE
POLOKWANE: “Karolo 129 ya Molao wa Taolo ya Matlotlo a Masepala (PFMA), e re
Khansele e swanetše go lekola Pego ya Ngwaga ka morago ga nako yeo e sa fetego dikgwedi
tše pedi ka morago ga gore e alwe pele ga Khansele go ya ka karolo 127. Komiti ya Masepala
ya Diakhaonte tša Setšhaba (MPAC) e swanetše go amogela pego yeo e nago le
ditshwayotshwayo tša setšhaba godimo ga pego yeo ya ngwaga le go ala dikutollo tša yona
pele ga Khansele ya Masepala wa Selete sa Capricorn (CDM) pele goba ka letšatši la 31
Hlakola (Matšhe) 2025,” gwa realo Meyaraphethiši wa CDM, Cllr Mamedupi Teffo, ge a ala
pego ya ngwaga ya khansele ka Labone la 06 Hlakola (Matšhe) 2025 hotelengtsoko ka
ntlenyana ga Polokwane.
“Pego ye ya Ngwaga ke pego yeo e laetšago tšwelopele yeo re e dirilego mošomong wa rena ka
diprojeke tšeo re boledišanego ka tšona ngwagola. Pego ye e thala seswantšho sa ka fao re
kgonnego goba re paletšwego ke go phethagatša maano a mošomo ao re bego re a thadile. Ke
pego yeo e laetšago dikatlego tšeo re di fihleletšego ka ditekanyetšo (dipatšete) tšeo di bego di
abilwe le dilo tšeo di re paletšego. Dinepo tše dikgolo tšeo re bego re di beile pele e be e le go
phethagatša maano a kgodišo ya ekonomi ya pele (first economy), go hlabolla ekonomi ya
magareng goba ya sekontari, go aga ekonomi ya tsebo, taba ya naga le mafarahlahla le taba ya
pušo le tirišano,” a realo ge a tšwela pele.
Mabapi le mananeo a kabo ya ditirelo, Teffo o boletše ka diprojeke tša meetse tšeo Masepala
wa Selete o di hlomilego dimasepaleng tša Blouberg, Lepelle-Nkumpi le Molemole. Le ge go
na le diprojeke di se kae tšeo di lego kgauswi le go rungwa, bontši bja diprojeke di maemong a
go fapana a kago. Pego ya Ngwaga e be e laetša, ka diphesente, bokgole bjo diprojeke tša go
fapana di tlago gona le mašeleng ao a abetšwego diprojeke tšeo. Ditlhotlo tšeo masepala o
kopanago natšo phethagatšong ya diprojeke di akaretša bohodu bja ditlabakelo tša go pompa
meetse. Masepala o na le melete ya meetse ya go feta 700. Ge masepala o ka re o thwala
bahlapetši ba go go šireletša metšhene ye, tšhelete ya go dira bjalo e ka phuhlamiša masepala
ka ge o se na tšhelete. Masepala o ipiletša go badudi go thuša ka go šireletša metšhene ya
meetse ya ditikologo tša gabobona. Masepala o boledišana le Kgoro ya Meetse le Kelelatšhila
go potlakiša dinyakišo tša kgonagalo ya go abela Molemole meetse go tšwa letamong la
Nandoni le go abela Blouberg meetse go tšwa letamong la Glen-Alpine, yeo e lego taba yeo e
ka tlišago kimologo go dimasepala tšeo.
Teffo o boletše ka bothata bja kelelatšhela masepaleng wa Lepelle-Nkumpi fao masepala o
rumilego maano a go oketša matamo a wona a kelelatšhila. Mošomo wa go aga dithoilete tša
VIP masepaleng wa Lepelle-Nkumpi o rumilwe fao malapa a 515 a holegilego ka projeke yeo
ya go ja R8 900 000.00.
Mabapi le matlotlo, masepala ga o maemong a bophelo bjo bobotse bja ditšhelete. Masepala o
katana le go abela badudi meetse fela bontši bja badudi ga ba lefele ditirelo tšeo ba di
humanago. Masepala o itshepile feela tšhelete yeo dimasepala di e humanago go tšwa go
mmušo go phethagatša merero ya wona. Maemo a a ditšhelete a šitiša masepala go hlokomela
mamaneo ao a lego gona goba go a oketša. Gabjale masepala o kolotwa tšhelete ya go feta
R800 milione go tšwa go baridiši bao e lego badudi. Go thibela bothata bjo go tšwela pele le go
gola, Khansele e amogetše melao ya go gapeletša go kgoboketšwa ga matlotlo go tšwa go
badiriši ka go diriša dimethara tša go phaphama (smart prepaid meters) tša go nyaka gore
batho ba lefe pele ba humana ditirelo. Le ge masepala wo o na le ditlhotlo tša wona, o humane
Pego ya go Hlweka (clean audit opinion) go tšwa go Molekodipharephare wa Matlotlo a
Setšhaba. Taba ye e laetša maikemišetšo a baetapele ba masepala ya go laola le go sepetša
ditšhelete gabotse.
Kopano ye e be e tsenetšwe ke makhanselara go tšwa dimasepaleng tša Blouberg,
Lepelle_Nkumpi le Molemole le bontši bja Magoši a selete.
